【轉載】TVB的賀年台徽片　終於叫做見得人

猛將「回歸」，果然有驚喜！！
說的是今年無綫品牌宣傳部，為四條頻道（互動新聞台除外）特別製作的丁酉雞年賀年版節目預告動畫和台徽片段，行內人通常稱後者為 Station ID。這些短小精悍的片段，每次播放僅數秒至十數秒，觀眾可能不大留意，卻暗地裏呈現一條頻道以至一家電視台的性格和視野。

一如以往，農曆新年期間，本地電視台（尤指無綫和已「執笠」的亞視）都會製作賀年版節目預告和台徽片段，在 YouTube 重溫 1980 年代的出品（如 1987 年無綫兔年台徽），會發現這些片段都是「以人為本」，由藝員參演，打鼓、燒炮仗、舞龍舞獅，甚有節慶氣氛，拍攝成本不少，1990 年代開始，電腦動畫普及，電視台為慳錢，賀年片段順應大勢「電腦化」，人味漸淡。

千禧後，亞視自《百萬富翁》（2001）的高峰後步向死亡，無綫一台極端獨大，令這種農曆新年限定的製作愈來愈慳皮，質素每況愈下，雖然 2010 年虎年的山水畫風設計曾「回勇」，堪稱過去 10 年最佳，之後 6 年（2011－2016），無綫秉承一貫以來的核突老套傳統，賀年版的節目預告和 Station ID 可謂「hea 到出面」，有咁核突得咁核突，肉酸到一個點，就趁機會重溫一下：

重溫一下：

  2011，辛卯兔年：
卡通兔仔跳跳吓＋中國剪紙＋桃花＋高山＋大吉＋彩燈，所有圖案扁平， hea 味極濃。

  2012，壬辰龍年：
飛龍走進尋常百姓家大灑金錢，稻田阡陌茁壯，風生水起，風車轉呀轉，意念雖好，可惜 hea 做，見到那些由地面升起的金色稻田咁搞法，好聽啲講，就係「長輩圖偽立體版」，真係睇到反白眼。

  2013，癸巳蛇年：
沒有最 hea，只有更 hea，意念疑似模仿 3D 概念，但明顯眼高手低，能夠在 15 秒內只用上彩燈、蛇形圖案和「福」字求其地合併做一個波跟香港人拜年，真係多謝晒，打牌睇到實輸錢！

  2014，甲午馬年：
堪稱過去 6 年最核突的製作，馬，全部都係馬，然後將不同書法字體的「馬」字，加上萬馬奔騰的 footage 合而為一，我開始覺得，兩年前網上瘋傳的「500 蚊 budget 幫手排 40 版小冊子」，如果變成電視版，應該是這種質素，真係恭喜你呀！

  2015，乙未羊年：
好喇，彩燈又出現喇 baby，還加上金扇、金色炮仗，還有好多羊咩圍住彩燈走，我諗唔通，點解 TVB 高層會收貨，真係咁都出得街？！

  2016，丙申猴年：
總算有點創新，低谷回勇。結合太空馬騮＋外太空＋揮春＋太空艙四大元素，傳統老套賀年元素幾乎消失，但相比過去幾年，呢條片唔算失禮。

  2017，丁酉雞年：
終於終於終於唔再肉酸，事關猛人——前品牌宣傳部總監Simon Kwan——正式回歸無綫，繼 2016 年策劃在台慶夜首播的 5 條頻道 5 條新 Station ID 之後，來到農曆新年，再次獻新猷，一洗同類製作的頹風。

Simon Kwan 曾任亞視高層，2003 年底製作的「2004 勢在亞洲」系列宣傳片，是其任內極出色的宣傳片作品之一（絕對沒有亞視常見「娘」味，有型！）。2004 年過檔無綫，繼續任職節目推廣，多年後離任，據行內人指，離開大台前他任職品牌宣傳部總監，早前再回歸無綫，過去在他帶領下，其團隊創作及製作的品牌宣傳片獲獎無數。

利用 iOS、Google Calendar 等近年常見的扁平插圖風格，糅合所有中國人過農曆新年的必要元素：雞、炮仗、舞獅、丑生、鼓、風車、彩燈、揮春、迎春花、團年飯、利是、一家人，以圓形串連在一起，帶出「新春喜慶團團圓圓」，夠熱鬧，又活潑，用色年輕，完全飛甩大台老套味道，這種製作質素絕對不是甚麼驚天地泣鬼神的創新意念，有人說我要求太低，但過去幾年因為同類製作實在太差，今回總算「回歸地球表面」，可以收貨，值得鼓勵。

有人問我，是否跟 budget 有關，當然是，亦不全然是，因為今年是無綫 50 周年台慶，預算加大碼不出奇，但有錢不等於能造出靚嘢，都要視乎負責策劃的人有沒有這種品味，純粹從觀眾角度出發，參考去年 11 月推出的 5 條頻道新 Station ID，Simon Kwan 是有心想提升同類製作水平，當然另一個關鍵是今有 ViuTV 加入競爭，他們推出的丁酉雞年宣傳片，由講稿含義（不易讀懂，要慢慢嗒）、旁白聲調以至畫面呈現，完全擺脫香港電視製作的框框，就係要話畀香港觀眾知，ViuTV 就係要玩破格，以美感評分，比 TVB 高出幾班，你話大台冇壓力，勢係假！！見微知著，希望這種製作的革新風氣能夠在 2017 年延續，觀眾不妨多花時間留意。

【編按：文章原刊於作者 Facebook。】

（本文純屬作者意見，不代表香港01立場。）