【練瑜伽】下世做樹啦你——平衡與專注

由於工作關係，我和同事們經常需要列印大量紙張，有時放工時每人要回收的紙張，厚如一本教科書，然後我們就會笑說：「唉，又print左咁多紙，好唔環保啊，下世做樹啦你！」

而瑜伽就有一個式子，叫「樹式」（Tree pose）。究竟要做一棵樹，最緊要是什麽呢？3、2、1，無錯，就是要夠堅定，否則會倒下，還有機會傷人。所以樹式講求的都是平衡， 要夠穩陣！ 簡單來說，樹式的步驟如下：

1.　（先做右邊，再做左邊）先將體重轉移至左腳。
2.　然後提高右腳，左腳單腳企穩，踩實地下。
3.　再將右腳腳板底踩入大腿或小腿內側。
4.　雙手合十在胸前，然後停留一陣，由十秒至十分鐘不等，悉隨尊便。(記住要轉腳，做返左邊！)

如上回提到，瑜伽動作充滿變化，單單是樹式就尤如自助餐般，有不同款式任君選擇。以下列出幾種：

1.　將右腳踩入左小腿內側。（適合初學或大腿肌肉較緊的朋友)

2.　將右腳踩入左大腿內側。

3. 右腳半蓮花式盤膝。(可同時開hip)

4.　雙手舉高。(可同時強化手臂肌肉)

5.　雙手合十在背。(可同時打開上背)

6. 抬頭向天望，甚至閉上雙眼，以進一步訓練平衡力和專注力。

要做到平衡，專注力是不可或缺的元素。貼士如下：

1. 收緊左腳大腿肌肉，再將左腳腳底的四角踩實地下，亦即是將腳跟的內外側，以及腳掌的左右兩邊壓實地下。
2. 至於右腳，亦要踩實入左腳，好似踩到凹陷般，然後再將右膝拉向後，指向正右方。
3. 雙眼向前望向遠方，聚焦固定的一點。
4. 這個比較抽象，就是感覺整個人向上吊高，亦即是不要將全身的力壓落腳掌，還要收腹，提高胸口，感覺上半身同時拉長拉高。

結果你發現，做樹並無想像般容易。而其實做人同做樹亦一樣，基礎紥得穩，才有力量支持你向上，伸展得更高更遠。

服裝：Top/Bottom: Ja'moire @ Just Yogis
攝影：Car Tsang Photography

（本文純屬作者意見，不代表香港01立場。）