【香港球員TALK 1】波衫、頌猜、發神經　黃耀富球衣的故事

「球衣，對我嚟講，唔係一件工衣、唔係一件制服，而係一件戰袍。當着起件戰袍，就要為上陣殺敵做好準備。你唔好理戰袍下嘅我係咩人，着起戰袍，就代表咗我係球會嘅戰士，為球會付出一切！因為這是尊嚴，要死就拼死在球場！」萬估不到，原來球衣對富仔（黃耀富）來說，都是這麼熱血。

作為一個有火的球員，他又如何看待球衣？

黃耀富，前港超球員，曾踢東方、公民、元朗等球會。初初認識黃耀富，只知道他是個「潮人」，一身打扮都走在潮流尖端。萬想不到，說起足球，他就是有火。

「做足球員，無火就死梗！踢波唔同返工，你當踢波係返工，你就死得。踢完就收工，咁踢嚟做咩？落得場就要搏，你用返工心態，就唔會搏得去邊。我好記得有年對住威廉（李威廉），我哋輸緊，但我都同佢講，你再過嚟我呢邊我一定剷低你。」

而正正就是這一團火，令他今時今日仍然盡心盡力推動五人足球。

「球衣，對我嚟講，唔係一件工衣、唔係一件制服，而係一件戰袍。當着起件戰袍，就要為上陣殺敵做好準備。你唔好理戰袍下嘅我係咩人，着起戰袍，就代表咗我係球會嘅戰士，為球會付出一切！因為這是尊嚴，要死就拼死在球場！」

萬估不到，原來球衣對富仔來說，都是這麼熱血。

「而且，球衣對我哋球員嚟講係一本書──一本歷史書。每一件都有我哋嘅汗水。每一季衫，係代表住我哋每一年嘅序幕同閉幕。」

「要我揀三件最有故事嘅衫，一定係呢三件。排頭位一定係東方！」

拿起這件東方球衣，同時見到富仔面上露出滿足嘅笑容。

「呢件我好記得係97-98年，嗰陣環境要我放棄踢波，因為甲組得返七隊，根本就無咁多位，所以嗰陣我踢業餘，無放棄過，雖然以為自己無希望再上返職業。」

「但估唔到有人揾我踢，就係東方。嗰年仲要贏埋高級組銀牌冠軍，所以呢件衫對我嚟講好緊要，見證住我無放棄，可以上返最高點。同時，亦都提醒我，時時刻刻都唔好放棄！」

富仔一臉認真地說。正當我想像他那份心路歷程，突然又轉tone道：

「仲有嗰時好興白boot，呢件黑衫裝落去白boot着到我好鬼型！仲要黑衫撞金字，加上我一頭型格金髮、俊俏面孔，根本無得輸，所以我印象好深！」

說罷富仔陰陰咀笑。（開始懷疑佢係神經嘅）

「以後一攞件衫出嚟，就會記得，呢件係我復出兼得到冠軍嘅波衫！」

那春武里呢？你沒踢過春武里吧！？

「嗰時我踢公民，但都開始覺得年紀真係大。件衫係我哋踢亞協，主場對春武里打和，完場嗰時換嘅。我從來都唔同人換波衫，但今次我忍唔住都要同佢換。」

「嗰場波我好記得，佢地全部都好細粒，但係好猜得，唔怪得當年總理叫頌猜！我半場無掂過三腳波！我喺度諗點解佢地可以咁成功？我一路踢一路好鐘意佢地打法，希望有生之年可以去睇下佢地個訓練系統係點運作。所以我主動搵左佢地個10號仔換波衫。」

我留意到富仔嘅眼神流露出一種「識英雄、重英雄」嘅眼光。

「其實場波完咗，衫換咗，但故事仲有後續。舊年有機會帶小朋友去春武里，搵返呢個10號仔，等佢帶啲小朋友睇下其他亞洲球會嘅訓練系統，等啲小朋友知道，亞洲球隊都可以好好波。唔一定淨係睇皇馬、西班牙，將目光放近啲，追趕下其他亞洲國家嘅水平。」

「最緊要係當年公民對春武里踢緊亞協，人哋今日已經係亞冠外圍賽常客。五人賽方面更加係亞冠冠軍！所以呢件衫對我影響好深遠，更加係令到我做教練嘅源頭。」

萬想不到，一件球衣，原來足以影響富仔往後足球上的道路；亦估唔到，對富仔嘅影響會係咁深遠。

黃耀富披上了發夢都沒有想過的港隊龍門球衣。

「可能大家會覺得奇怪，點解我會有件港隊龍門。其實呢件係五人隊嘅龍門，亦證明咗五人足球嘅可塑性、變化有幾大！一個一直喺場內踢嘅球員，都可以做到龍門！」

我發覺富仔一講起五人足球，就感受到他心內那團熊熊大火燃燒着。

「你未踢過、睇過五人足球，你永遠唔會感受到佢哋嘅變化同要求。你諗下：一個球員，可以咩位置都踢，連龍門都要踢埋，嗰種技術要求，隊友嘅配合係幾咁重要。所以我認為五人足球嗰種潛在發展，正正就係香港青訓所需要嘅！」

富仔講到手舞足蹈，感覺神經質又開始發作。

「我33歲嗰陣時都以為足球就係咁，直到踢完五人足球，先發現原來足球仲有好多變化。只要你肯去變，踢到70歲都仲有得變。五人足球做青訓基礎，外國好多球會一早已經沿用。香港場地有限，其實好應該向住呢個方向去搞青訓！」

回顧黃耀富的職業生涯，其實絕不失禮。除了聯賽冠軍外，其他所有盃賽冠軍都有他的名字：包括賀歲杯（當年以公民昆卡聯隊奪標）。

希望今後足運發展，能夠如富仔所說：定下方向、保持進步，令到香港足球能持續發展，達到頂級亞洲水平。

最後，我只想講：黃燿富嗰團火真係唔講得笑！

【編按：以上相片由作者提供。】

（本文純屬作者意見，不代表香港01立場。）