【01博客咁睇波】比馬會更準的估波必勝法
冇計，人人都想做標題黨，希望你唔係真係信有估波必勝法（雖則性交改運都有人信），而我又會無私同你分享。
不過，唔好嬲住，唔係玩讀者嘅。必勝法當然冇，但令你減少失誤嘅方法，就真係有的。
咁，自己犯少啲錯，就已經贏到人地啦。
執筆之時，4 輪分組賽之後，小弟在 01 博客估波榜都仲係榜首（中 3 場，而意大利贏比利時係冇人估中嘅）。
如果我一早寫呢篇文，就真係會連意大利嗰場都估中添。
真係冇呃你！點解？睇埋落去啦。
今屆歐國盃，有人話好少爆冷，有人唔同意。何謂熱門冷門，就有點 tricky。一般嚟講，「強隊」，或者「多人睇好嗰隊」，就叫熱門。但何謂「強隊」何謂「多人睇好」，都有點主觀。對女讀者嚟講，強隊就當然係你男朋友／老公捧嗰隊。對跟紅頂白嘅人嚟講，自己捧嗰隊就係「多人睇好」，對包拗頸嘅人，就相反。
本人半個數佬，就講客觀，睇數字。強弱冷熱，不外乎睇 3 樣嘢：
賠率
國際足協排名（以下簡稱「足協排名」）
賣個關子，陣間話你知，匈牙利人，梗係啲高深嘢
亦都留意，呢 3 個系統，代表 3 種不同的哲學。
系統 1——賠率
代表「群眾智慧」，唔止代表多人捧，亦代表多人真金白銀支持。畢竟愛國憤青可以估中國拎世界盃，但拎成副身家買，就另一回事。
系統 2——足協排名
就當然係萬惡的國際足協搞出嚟，不少球迷都覺得公信力極低。但好歹都有條數計，即管快手講下（冇興趣睇的，請直接跳去系統3）。
足協排名，最初 1993 年就只係好似聯賽咁，贏波 3 分，和波 1 分，輸波 0 分。聽落都知流得很，比人笑到七彩。後來經過兩次改革，叫做冇咁廢。
而家嘅計法，除左贏輸，仲計埋：
賽事性質——太公波友誼賽，重要性當然不及世界盃賽事
對手實力——德國大炒聖馬力諾，同狂數巴西，當然又唔同
地區實力——歐洲或南美的隊就巴閉啲，高分啲咁話
時間——最近踢嘅賽事，當然對排名影響大啲
曾幾何時（1999－2006 年）仲會計埋你入人幾多球，以及你場波作客定主場。而家已經冇再計。
呢套排名，成日比人批評。遠嘅包括挪威在 1994 年排到世界第 2，美國在 2006 年亦排到第 4，佢哋自己都拎嚟笑。近嘅，比利時 2015 年尾排世界第 1，一樣比人笑，因為佢地過去13年先踢過一次大賽決賽周咁大把。另一大問題係，大賽主辦國因為只踢友賽，排名特低。巴西 2014 年只係排 22，法國今年只係排第 9，但賠率嚟講兩隊都係超熱門。
系統 3——高深嘢
係乜？都係排名。但係叫「Elo 排名」（Elo rating system），就係一個匈牙利人 Arpad Elo 搞出嚟的。之前主要係國際象棋或圍棋選手用，而家有人用黎排足球隊，但官方冇認可過。
Elo 排名點計？實在複雜，保證你悶親。呢度只係講返，Elo 排名最重要嘅兩個特質：
第一，Elo 分數，理論上係「歷史可比」嘅，即係話你可以拎今日隊英格蘭，同 30 年前隊西德比較。《經濟學人》早排有篇文，講而家嘅英格蘭，不見得比 1966 年主場捧走世界盃嗰隊弱。只要有兩隊的 Elo 分數，大約可以計到每隊贏面有幾多。
第二，Elo 分數某程度上「劫富濟貧」，「自我修正」。贏家在輸家身上面拎分，但都睇強弱，德國大炒直布羅陀唔會加好多分，而哥斯達黎加贏咗意大利就拎多分。
講咗咁多，理論無謂，王家衞話齋，估波嘅嘢，中就牙擦，輸嘅抬走。咁實戰上，到底係睇賠率準？定睇足協排名準？定係 Elo 最準？亦即係話，到底群眾智慧準？定係官方最醒 father knows best？定係科學必勝？
實踐是檢驗真理的唯一標準。以下係今屆歐國盃 24 隊嘅足協排名，以及 Elo 排名，就照排返第 1 至第 24。留意 Elo 排名每場波後都會變，我拎嘅係 6 月 15 日左右的數字。唔好鬧我做乜你去睇個排名同我唔同。
下面呢個表，嘔心瀝血，冇苦勞都有肺癆，係歐國盃頭兩輪賽事。為免篇文寫幾萬字，和波嘅拎走唔計，24 場剩番以下 16 場。Elo 同足協排名就睇上面個表，而賠率，就跟返馬會主客和最後數字：
一大堆嘢唔知做乜？ 幫你解畫：
1）首先，16 場有 9 場（即係過半），都係眾望所歸「熱門勝出」，三大系統一致。例如法國西班牙談笑用兵兩戰兩勝，排名同賠率都同對手爭好遠（當然法國足協排名只有第 9 就一大笑話，上面講過）。
2）另外，有 3 場真冷門。三大系統一致估錯。咁啱 3 場我都有睇。威爾斯對斯洛伐克嗰場，你見排名同賠率都咬得好緊，戰情亦好緊湊，真正五五波，唔係「爆冷」得咁誇張。剩返兩場，匈牙利勝奧地利，同北愛勝烏克蘭，就係「真冷門」。
3）剩低嗰 4 場，就見真章，三大系統打交。留意頭兩場，克羅地亞勝土耳其，以及波蘭勝北愛。Elo 同賠率都成功估中，就係足協排名估錯，難怪比人笑冇代表性。
意大利勝比利時嗰場，有點冷味。01博客冇一個估意大利贏。賠率係比利時熱啲，足協排名係比利時高啲（都話歐洲第一！）。但，Elo 話你知，意大利先係真強隊。所以話如果我一早寫呢篇文，就應該估中意大利！
剩返斯洛伐克勝俄羅斯嗰場，足協排名威返次。唔識解。
4）埋單，Elo 中 12 場，馬會賠率中 11 場，足協排名中 10 場。留意足協排名威返次嗰場斯洛伐克勝俄羅斯，係第 2 輪。如果只計第 1 輪，排名不變，但勝負分野更加明顯。
結論，果然係官方嘢信唔過，足協排名，公信力低過馬會阿叔的群眾智慧。但畢竟精英就係精英，匈牙利佬 Elo 大半世紀前（1960 年）發明嘅系統，都仲係最準。
下次估波前，就唔好信自己的「獨具慧眼」，亦唔好信群眾智慧，更加唔好信官方。最緊要講科學。
最後，其實歐洲大學早幾年已經有人做咗呢類研究，一早證明 Elo 系統應該最準。所以我呢篇只係 reinventing the wheel，重覆前人做過嘅嘢。不過，嗰篇始終係學術論文，我就將佢用你哋睇得明的語言寫出嚟。大學主修數理科目嘅，大可以搵原文嚟睇，唔算太深，至少我好快睇哂。廿頁紙之嘛。
（本文純屬作者意見，不代表香港01立場。）