【武術01】鴛鴦迷魂鎖英文係乜？
花式足球員施寶盛街頭捉賊
見義勇為，認真勁抽
不過話時話，鴛鴦迷魂鎖英文係乜
又英文係乜，其實悶唔悶？
施寶盛除咗花式足球技術了得，仲有顆熱心助人嘅心，真係香港之光。花式足球我真係少睇，所以上網睇返佢嘅片，除咗「好勁」之外，都講唔到咩，有機會想親眼睇下。
都係講返我識嘅嘢啦。
打電話問功夫
睇返報導：「他（施寶盛）說，其實這招沒有特別名堂，只是在體育節目中看過一些防身術動作，於是就手腳並用夾住賊人......昨日他收到網友相片後上載到自己的Facebook，不少網友都想起周星馳電影《上海灘賭聖》打電話問功夫一幕，為他的一招冠名為『鴛鴦迷魂鎖』。」（最下面有報導連結）
施寶盛呢招似咩後面再講，先講講其實《上海灘賭聖》打電話問功夫嗰一幕係無鴛鴦迷魂鎖嘅 ！嗰幕有納爾遜式鎖、霹靂追魂鎖、鴛鴦乾坤扭紋鎖，就係無鴛鴦迷魂鎖！
喺戲入面，睇返字幕，納爾遜式鎖就咁叫lock，霹靂追魂鎖叫ghost lock，鴛鴦乾坤扭紋鎖叫twist lock。其實三招都係摔角招嚟，納爾遜式鎖係full nelson、鴛鴦乾坤扭紋鎖有少少似abdominal stretch、霹靂追魂鎖真係睇唔出，應該係某種camel clutch變體，我估。（摔角真係唔熟，如果我錯話我知）
講多句，巴西柔術入面有個鬼才叫Eddie Bravo，佢發揚光大嘅 twister可以話就係訓喺地嘅abdominal stretch。（呢招可以講一日，例如呢招本名都係叫guillotine，即斷頭台，但巴西柔術入面又有招同名，唯有改名做twister......當中仲有好多故仔，搵次講）
鴛鴦迷魂鎖呢？
我估鴛鴦迷魂鎖，係大家合埋咗「鴛鴦乾坤扭紋鎖」個「鴛鴦」同「迷魂鎖李雲」個「迷魂鎖」。
鴛鴦，按《香港粵語慣用語研究》，有四個意思：
（一）雌雄成對生活的鳥
（二）成雙成對兒的（人或物）
（三）不成雙成對兒的（東西）
（四）奶茶咖啡混合飲料
日常對話嘅時候，好多時會將以上（二）（三）合用，即「兩者有差別但又配成一對」，好似鴛鴦筷子一長一短或者兩隻唔同款。我估喺呢到，係指兩人一前一後、一左一右、糾纏不清嘅樣？
（一）嗰種雀英文名叫mandarin duck，（四）嗰種飲品會叫coffee with tea 或者直接叫Yuanyang，但係（二）（三）合用嘅情況，我真係唔識英文係咩！Mismatched喺呢到又唔岩用喎，唯有用音譯Yuanyang先啦。
另一方面，迷魂鎖就清楚好多。迷魂鎖李雲（Mark Lewin）係一位好有名嘅摔角手，好多老一輩嘅朋友都聽過，佢嘅絕招就係迷魂鎖。迷魂鎖即係裸絞/RNC（rear naked choke），大家一睇就知大概係點。
其實直接叫返RNC啦，大家用開嘛......
施寶盛呢招又係咩？
在下才疏學淺，由張相睇只可以講一定唔係任何嘅chokehold，更似係一種half guard嘅變體。half guard即係半防守姿勢，大概係你喺下位但兩雙腳夾住對方一隻腳，唔明睇圖。
有一種half guard變體叫 Lockdown ，都係兩腳繑實對方的一隻腳，不過會再用腳腕勾返住（仲要伸返直lock實，唔明睇圖），不過就只係lock一隻，睇相施寶盛就將個賊兩隻腳都繑實埋。不過，嗰時情況危急，最重要係繑得實。
最後講講，以上動作唔好亂試。仲有，大家平時都要小心財物同注意安全呀！今日係咁多！
（本文純屬作者意見，不代表香港01立場。）