NBA 勇士勢如破竹　林書豪俾人恰到上面

NBA 季後賽開鑼，又係美國東西岸 16 支 強隊爭奪冠軍指環嘅時候。對唔住，冇得再講高比，佢已經退役，湖人亦冇份打季後賽。不過只要記住勇士隊同埋居里，點都可以同朋友吹到一兩咀。

勇士剛於呢一季 82 場常規賽，以 73 勝打破咗米高佐敦喺芝加哥公牛保持咗廿年嘅 72 勝記錄。不過勇士主將居里（Stephen Curry）啱啱喺對火箭嘅第一場季後賽扭傷咗右腳，嚟緊唔知出唔出到場。

不過若嫌人人都講勇士太 trivial，想表現一下自己嘅獨到嘅觀點，就必定要提一提黃蜂嘅「林瘋」林書豪。

點解？因為早兩日，有球迷剪咗一段林書豪喺球場上俾人恰到上面嘅集合，喺 YouTube 瘋傳，唔使十日已經有過百萬人睇過。

片段中一個個慢鏡，影住林書豪多次被對手疑似惡意犯規，有意無意又批踭又兜巴星，鼻血都流晒出嚟，但係球證從來唔吹罰。連《紐約時報》同《福布斯》都刊登文章報道，問係咪因為林書豪作為 NBA 唯一一個黃皮膚球員，又冇姚明咁大隻，所以面對最原始嘅種族歧視？

書豪喺 Twitter 回應話：「吹罰與否，唔到我控制。我會繼續頂硬上！」NBA 官方都作出回應，話「從來都沒有」虧待林先生。網民當然唔收貨，話官方回應「令人失望」。話晒近年美國種族歧視問題甚囂塵上，睇嚟事件仲有排發酵。黃蜂今季都有份打季後賽，還看嚟緊幾場賽事，會唔會再有敏感動作喇。

 延伸行動： 

請連拳王泰臣都畀佢打到食指骨裂的宇宙最強甄子丹，去美國，教番林書豪幾招，打詠春籃球，等你批踭同兜巴星吖喇，上籃時連消帶打，等下邊個夠膽埋身。