勁敵退選　特朗普幾乎篤定成總統候選人

接近走過全美國所有繁華大地，經歷 47 場初選之後，共和黨總統候選人提名戰終於有突破性發展喇！先唔使太興奮，因為發展有突破，劇情冇突破：富商特朗普節節勝利，迫得最大勁敵克魯茲宣布退選後，最新消息，連俄亥俄州州長卡西奇都投降，退選喇！即係話，特朗普已經近乎鐵定會成為共和黨嘅總統候選人。

呢幾個月嚟，共和黨總統候選人提名戰真係好睇過《愛．回家》。試問又有邊個會諗到，一個「何不食肉糜」嘅富二代，正正係因為太有錢，唔使向商界籌募選舉經費（佢話），令人相信佢唔會受到商界大鱷制肘，竟然贏得草根階層嘅支持！

而且佢得閒無事就信口開河，呢頭話要起一道「萬里長城」擋住墨西哥移民（要墨西哥畀錢），嗰頭又話要禁止所有伊斯蘭信徒入境美國（除咗有錢嗰啲），勁到連《衰仔樂園》都睇唔過眼要笑佢。你咪理，每一次電視辯論，佢係要拖晒其他競爭對手喺台上一齊泥漿摔角，吸引到好多保守白人嘅支持。

無他嘅，因為特朗普懂得運用恐懼。美國標榜「種族共融」，但種族之間始終衝突不斷。根據美國人口普查，50 年內，白人以外嘅族群將會佔美國人口過半，呢個時候有個口沒遮攔嘅有錢佬提出極保守種族保護主張，食正白人驚驚心理，異軍突起。

克魯茲成日被形容為特朗普最大勁敵，但查實佢一直只係陪跑，直至退選一刻，所得嘅黨代表票，都只及特朗普一半。克魯茲退選後，本來，仲有人幻想俄亥俄州州長卡西奇識玩「敵人的敵人就係朋友」的古老智慧，將「特朗普獨大」呢個優點變弱點，盡吸天下反特朗普票源，或足夠阻頭阻勢，令特朗普PASS唔到 1,237 張黨代表票嘅合格線，咁就有得玩喇！

睇相佬呃你十年八年，以上幻想係呃你一日；克魯茲唔玩，卡西奇亦瞬即決定不留。

政治真係一日都嫌長。無論結果如何，我等半個地球以外嘅他者，對於美大選選情，只能隔岸觀火食花生，到半年之後，特朗普真正當選了，掃完一地眼鏡碎，先再諗諗萬一真係會打仗，匿去邊都未遲嘅……

 延伸行動： 
因為有特朗普，美國總統大選隨時係人類生死存亡嘅關鍵（誤）。想及時分析緊湊嘅選情？一定要密切留意《香港01》博客梁啟智嘅【追蹤美大選】喇！