任天堂統一「小精靈」華文譯名 皮卡不再「超」
撰文：博評組
出版：更新：
（《激嬲女朋友，佢叫我扮比卡超同佢溝通》Youtube截圖）
4 月 10 日，日本任天堂公佈《寵物小精靈》統一華文譯名，引起香港粉絲鼓譟。
哼，少年你太年輕了。上一次，只係統一遊戲名，所以，香港嘅《寵物小精靈》、台灣嘅《神奇寶貝》、中國嘅《口袋妖怪》，從此全部統稱《精靈寶可夢》。但今次更嚴重！！因為被整合嘅，係當年你同我無日無夜、廢寢忘餐、嘔心瀝血都儲唔齊嘅 151 隻初代「小精靈」。
為慶祝《寵物小精靈》20 週年，任天堂即將發售兩個紀念作——《精靈寶可夢．太陽》同埋《精靈寶可夢．月亮》。而且會係 20 年來，第一次有官方中文版！但係可能日本任天堂覺得如果中文版要分三個版本， 太「政治不正確」 太麻煩，所以決定一刀切，全部統一改新名。
港版寵物小精靈遊戲會正式改名成「精靈寶可夢」。（Youtube截圖）
兩岸三地最受影響嘅，一定係香港。我哋用廣東話翻譯，大部分都同台灣、大陸唔一樣。香港粉絲反應好大，之前有人發動聯署，要求保留地方文化差異。可惜巨輪在轉，「比卡超」終須變成「皮卡丘」，「車厘龜」成為「傑尼龜」，「傻鴨」傻到變「可達鴨」……就好似童年時曾相識，一下子變晒陌路人，講起都眼濕濕。好在，有啲因為大家咁啱譯名相同，避過一劫，例如「小火龍」、「蚊香蝌蚪」、「海星星」、「鯉魚王」……
今次有百幾隻小精靈一齊改名，仲慘過早幾年《叮噹》被改名做《多啦 A 夢》。《叮噹》角色比較少，「靜兒」、「技安」變成「靜香」、「胖虎」，都尚算記得住。好在陳浩民主唱嘅主題曲，唔使改歌詞，仍然可以高歌「I love Pokémon！認定你是朋友！」
延伸行動：
冇希望㗎喇！任天堂決定改名，小精靈困住喺細過籠屋嘅精靈球，冇人權、冇公投、冇 say 㗎！以後比卡超，只能夠靠「比卡超潮文」永遠懷念。大家一齊深呼吸，向窗外大叫：「比卡超比！！！」