高登爆補習社師生戀 遵理獨立委員會調查
「問世間，情是何物，」出自 800 年前金末元初詩人元好問嘅《雁丘詞》。到咗千禧年代，下句已經由「直教生死相許」變成「直教『蝦條』相許」。星期日，有女學生喺高登討論區開 post，用千字長文，第一身角度細訴與補習名師持續一年嘅愛情故事。但係文中嘅學生妹覺得，與其話係愛情，倒不如話係被欺騙感情，仲畀老師呃埋「蝦條」（失身），o趙完鬆。
是咁的，女學生參加咗名師補習班，因為問功課，二人開始短訊交流，漸生情愫，但係言談之間，女學生意識到老師不斷性暗示。女生小鹿亂撞，道德感情交戰，然後一次約會，她，答應了。
以為愛情從此開花？點知老師開始冷待女生，唔覆 message，避而不見，最後仲 block 晒 facebook、whatsapp。女生終於了解到：
他所謂的「喜歡」只是建立於性之上。一但得手了，我就已經完全失去價值了……我既然被他這樣找上了，我也相信我不會是第一個，亦不可能是最後一個。
故事賺人熱淚，網民爭相轉載，唔使一日，已經推爆咗幾個高登 post，高登仔仲搵到疑似涉事男事主——遵理學校通識科補習名師 Oscar Ma。
Oscar 起初矢口否認，話文章抹黑，生安白造。事件驚動到遵理老細 June Leung，佢表明反對師生戀，力撐下屬清白之身。女事主決定公開與老師嘅短訊對話紀錄，同埋喺老師屋企影嘅相，圖文並茂力證真有其事。Oscar 發現事態嚴重，決定報警，並且喺 facebook 出 post 澄清自己冇生痣！（女生文章提及老師那話兒「左邊有粒黑色痣」。）
但係隨着公開嘅證據愈嚟愈多，連原本撐 Oscar 嘅另一補習名師「化學博士」Kelvin Lau 都轉軚向女事主道歉。尋晚，遵理學校同埋 June Leung 分別發表聲明，決定委任獨立人士組成委員會調查事件，簡稱「呃蝦條調查委員會」（誤）。
故事合唔合理，證據真定假，睇嚟要靠警方同埋「委員會」嘅調查先會水落石出。但就咁，若有錯在先，被揭發最蠢是輕敵，一味否認等定低估對方所持嘅「黑材料」，「否認吖嗱？爆多啲睇你仲認唔認」是正常反應吧？仲有，不認不認都要向公司認啦，免卻老細同事「跟車太貼」引嚟尷尬，變埋頭條新聞。真愛無罪，雙方如果係坦誠相愛（前提是坦誠，仲要相愛！），或者當今社會已經能夠接受師生戀呢？