文：洛迪高@世界波

今季英超開季至今，曼市雙城雖然未至一騎絕塵，拋離對手，但兩隊已經展示出決心，並以成績表示要將英超皇座帶回曼市。除咗佢哋係頭7戰同得6勝1和得19分，就連喺英超神射榜頭2位都見曼市球員：盧卡古（Romelu Lukaku）以7球坐上榜首，曼城嘅阿古路（Sergio Aguero）以6球排第2（同樣以6球一齊排第2嘅係聯賽排名第3，熱刺嘅哈利簡尼（Harry Kane），及聯賽4哥，車路士鋒將摩拉達（Alvaro Morata），而助攻榜頭2名都係曼市雙雄球員，分別係6球嘅大衛施華（David Silva）及5球嘅米希達利恩（Henrikh Mkhitaryaｎ）。

位處同一城市，爭逐同一樣嘅錦標，但兩支球隊唔止有唔同色彩，而佢哋喺爭標上，雖然同歸，但卻走殊途。

教練：理想主義VS現實主義

哥迪奧拿（Pep Guardiola）對於自己戰術哲學相當堅持，無論執教巴塞隆拿、拜仁慕尼黑或曼城，佢畀人人嘅印象都係一定要將自己一套套入球隊，喺組軍以及臨場戰術彈性方面稍為缺乏，所以喺執教巴塞後期開始有唔少球隊搵到對付巴塞嘅方法後，佢都無咩點對症下藥。至於去到拜仁，喺歐聯都不乏大敗經驗，而喺曼城就更加無咁順風順水，但無論點樣畀人打突擊輸波，佢都一樣咁堅持球隊打法，例如經常令球迷驚嘆嘅3後衛（驚嘆係因為3後衛嘅中堅會有啲平時踢閘嘅球員。），然後防中拉落，睇到好似中堅位置咁發起攻勢等等，喺哥帥每場比賽都會出現，所以話佢喺理想主義者都不為過。

至於摩連奴（Jose Mourinho），話佢淨係識泊大巴當然只係一句笑話。摩帥成名處在於好識得調查對手並就對手弱點作相應安排，另外亦擅於審時度勢，因應大局作留放。正如佢喺第二次執教車路士初期亦大踢進攻中足球，攻勢行雲流水，但最後亦回歸實用主義。而佢喺今季購入盧卡古後，都為球隊提升咗入球能力，不時大勝，而且好多入球都出現喺80分鐘打後，但上場聯賽對修咸頓雖然都頗早取得領先優勢，但可能因為有歐聯後顧之憂，球隊無乘勝追擊，反而換入防守球員只求取得勝果，結果畀聖人壓住嚟踢。佢咁樣做似乎有成果，因為紅魔喺接落嚟嘅歐聯比賽作客莫斯科大勝莫斯科中央陸軍4：1。由此可見摩佬絕唔係一一成不變嘅教練，可以隨時限米煮限飯，喺適當嘅時候變得保守，正宗係現實主義表表者。

戰術：陣地戰VS快速反擊

哥帥主張傳控足球，往往利用控球時間，早早為比賽定調，並利用傳控「磨」死對方，令對方犯錯及己方球員跑動創造空間殺死比賽。至於摩連奴一早以來比賽都唔係以傳控出名，亦唔會特別作高位迫搶，往往誘敵深入然後利用高速反擊及攻擊球員個人能力製造入球。

後防線：創造與破壞

購入哥迪奧巴禾（Claudio Bravo）同史東斯（John Stones），上任即賣走祖赫特（Joe Hart）等等，證明哥帥上任之初已經希望極速將哲學帶到球隊，而由中堅甚至龍門開始做起，正是哥帥戰術一一大標誌。雖然巴禾收購算係失敗，不過今夏收購巴西門將艾達臣（Ederson Moraes）算係改善龍門位置最講求嘅撲救質素，而艾達臣喺用波上都唔算差。至於後防線上，中堅以及閘位球員用波都唔會差，可以你會見到有時哥帥球隊有時甚至用上閘位球員都可以出任中堅，因為只要用波夠好就無咩大問題。

至於摩連奴，用上破壞或者會太誇張，但摩連奴用上嘅後防球員都係以防守元素秤先，好似身體質素，單對單以至協防能力，好似近來摩佬特別器重嘅拜利（Eric Bailly）以及鍾斯（Phil Jones）嘅身體質素及對防守熱情嘅投入就正係摩佬執教以來球隊防線象徵嘅縮影。

中場線：小範圍配合與個人突進

哥帥打傳控，當球隊以短傳向對方腹地層層推進時，進攻球員喺對方三閘線就會發揮跑動及創造力。

至於曼聯雖然都係一定嘅小範圍配合，但更多嘅係中場或邊線球員由中場起動，利用速度及技術作個人突破，就如米希達利恩及普巴等，配合番本身快速反擊嘅戰術思路。

前鋒線：小鋼炮與坦克車

哥帥選前鋒，偏好靈巧型，就算拜仁時代嘅利雲度夫斯基（Robert Lewandowski）有身形但速度絕對不慢，而佢喺曼城嘅鋒線主將阿古路及加比爾捷西斯（Gabriel Fernando Jesus），甚或史達寧（Raheem Sterling）都屬敏捷型。腳下技術甚佳嘅佢哋對於小範圍配合及於禁區極小空間下用腳下技術尋找戰機或靈動搶點作用極大。而且輕靈嘅佢哋亦可快捷地於失球後佢頻繁而快速衝刺，在前場壓迫。至於曾於哥帥麾下效力，現效力紅魔嘅瑞典神鋒伊巴謙莫域（Zlatan Ibrahimovic）就曾投訴效力哥帥旗下巴塞隆拿時，要不時來回折返跑，對於佢咁龐大身型係好辛苦！

至於曼聯方面，由於戰術先傾向快速反擊，摩佬先係需要一位鋒線橋頭堡作持球分波畀後上隊友，加上球員配置上，具後上威脅嘅球員不少，因此有咁上下身型hold波嘅前鋒球員就更重要，而盧卡古雖然技術欠奉但有身型，亦勝任此角色；至於伊巴有身型有技術則更佳。現時正選盧卡古具爆炸力，步大力雄嘅佢於反擊中都可以面對龍門衝擊防線，此質素則為年紀較大，不以速度見長嘅戰神所欠奉。另外摩佬球隊進攻上往往靠前場球員個人能力解決問題(如國米時多次只靠史奈達（Wesley Sneijder），迪亞高米列圖（Diego Milito）及伊度奧（Samuel Eto'o）三人解決戰鬥)，如今前線上幾位球員都具個人埋門能力，而再拎盧卡古及伊巴身形嚟講，如果要作高空攻勢的話，雖然九號及十號不算以頭鎚見長，但總能搵到著數，都還未提及於摩佬手下大翻身嘅爆炸頭費蘭尼（Marouane Fellaini）……

踏入國際賽期之際，曼城入22球，以1球之差領先曼聯暫列榜首，但曼市強勢能否捱過頻密賽期？尤其是紅魔賽程相對輕鬆，下週對陣宿敵，兼往往雙紅會打高幾班波嘅利物浦方為真正考驗，而背黎數支倫敦球隊，正虎視眈眈。

（文章純屬作者意見，不代表香港01立場。）