【博評】學界籃球不兒戲：推動籃球文化，由學界波做起
撰文：邱益忠
出版：更新：
港島區D2中學校際男子A Grade決賽，筆者好興奮為香港01同Jumper Basketball獻出處男講波，比好多口痕嘅波友葡萄，點解其貌不揚嘅我，可以同Jumper女神Riddle一齊講波！
如果你淨係留意靚女，實在太膚淺，因為Jumper Basketball全港獨家直播呢場D2決賽，賣點喺邊？
港島區D2中學校際男子A Grade決賽，筆者好興奮為香港01同Jumper Basketball獻出處男講波。（作者提供圖片）
今季跌落D2比賽嘅聖若瑟書院，為咗要重回顛峰，得到效力甲二晉裕嘅舊生趙嘉雄傾力幫忙，引入「響尾蛇戰術」，每場大打全場緊迫，每場平均轟入66.8分，淨勝分去到近28分，認真誇張！此外亦同時實行育蛇模式，師兄趙嘉雄帶領一班小師弟征戰地下聯賽吸收經驗，甚至參加康文盃，例如 #13謝嘉浚曾經一場射入8球三分波，令眾小師弟嘅戰力喺短時間得到大大提昇！
今場決賽，全力爭冠嘅聖若瑟書院喺上半場已經勇士隊上身，狂轟十球三分波，幫助佢地上半場以41:24領先筲箕灣官立中學。
憑住全場轟入22分，決賽MVP嘅 #3楊筌皓、射入15分嘅#13謝嘉浚以及防守表現極出色，搶走十幾球籃板同四次封波嘅 #11許子樂，聖若瑟書院喺第四節中段已將比數拉開至60:38！
不過筲箕灣官立中學未有放棄，反而模仿聖若瑟書院嘅響尾蛇戰術，不斷大打快攻，當中全場最高26分嘅 #13「楠哥」陳浩楠兩次搏得And 1，將比數拉近至55:69，爭一口氣。
今季跌落D2比賽嘅聖若瑟書院，為咗要重回顛峰，得到效力甲二晉裕嘅舊生趙嘉雄傾力幫忙，引入「響尾蛇戰術」。（作者提供圖片）
箕灣官立中學未有放棄，反而模仿聖若瑟書院嘅響尾蛇戰術，不斷大打快攻。（作者提供圖片）
要推動籃球文化，肯定要由學界波做起。以傳媒僅有嘅資源，又點樣做到深入了解每隊波、每位球員嘅特性？筲箕灣官立中學攝影部成員Hugo賽前為校隊成員製作海報圖，甚至做埋Facebook Live，令未能到場支持嘅同學都可以重溫賽事，非常難得！筆者希望將來有平台整合每一間學校嘅賽事同球員資料，令大家更投入其中！
筆者（右）賽後訪問兩位小師弟，全場轟入22分，決賽MVP嘅#3楊筌皓（中）以及射入15分嘅#13謝嘉浚（左），兩位話精英賽要殺入八強！
（本文純屬作者意見，不代表香港01立場。）