踢完分組賽，球迷可以休息下，寫文嘅亦會總結下各隊表現、靚女球迷，以及球證表現等等。
今年多咗樣嘢講，決賽周擴張到24隊。由決定第一日已經有人鬧（當然亦有人歡喜，例如匈牙利）。
24係一個好方便的箭靶，乜都可以賴落佢身上。
等我幫24講番幾句好話。
歐洲強隊林立 賽事質素冇降低
先講第一樣批評。未踢已有人質疑，擴張到24隊，搞到分組賽變成踢多輪外圍賽。製造魚腩部隊，拖低賽事質素。但，明顯地呢樣嘢冇發生。
6隊新丁（包埋因為闊別大賽多年，之前比我夾硬當埋「新丁」的匈牙利），亦係Elo排名最低嘅6隊（唔知係乜可以睇番上一篇文）。威爾斯同冰島直接出線，北愛同斯洛伐克拎小組第三出線，匈牙利亦係首名出線。我最愛的阿爾巴尼亞就出局，但都有小組第三，算抬得起頭。
包尾嘅，係羅馬尼亞、俄羅斯、烏克蘭、捷克、瑞典、奧地利等等舊勢力（對，好多東歐隊，作者好傷心）。
點解會咁？因為，歐洲其實好多「強隊」。頭24名，分別唔係你想像中咁大。唔似歐聯，歐洲球會強隊弱隊，可以相差好遠。
又係講科學，Elo排名第一嘅德國，同包尾嘅阿爾巴尼亞，爭400分左右。400分即係點？講過啦，Elo分數有「可比性」，400分距離，在球會，等於皇家馬德里同意甲拉素咁上下分野。計數，就係拉素10次先贏到1次。「皇馬同拉素都爭好遠喎！」但，講緊已經係最勁同最差果隊喎。歐聯？上屆最勁嘅皇馬，同最差嘅斯洛文尼亞球會Maribor比，爭左630分。Maribor踢40次先贏到1次。
一眾「弱旅」「新丁」表現不遜傳統國家，已經係支持24嘅最好理由。
第二樣批評。24隊賽制令到入球少，入球遲，踢法保守，賽事沉悶。入球少入球遲係事實；保守、沉悶都冇講錯。而我唔會扮高深咁話睇防守都好好睇（雖則可以係真）。但，真係24隊的錯嘛？
話你知，問題出在16，唔係24。6隊小組第三都有4隊有得出線，造就「唔贏都唔好輸」的心態。特別係第一輪拎左3分果啲隊。德國波蘭首仗都拎3分，結果第二場零比零和波。過程唔算太悶，但難免令人覺得大家和氣生財。因為兩隊4分，基本上都好難出唔到線。但呢啲，係16嘅錯，唔係24嘅錯。
默契波 造就走線 真係有？
第三樣批評。最後一輪默契波？其實又唔係多喎。有人睇完第三輪法國和瑞士就咁講，睇埋英格蘭和斯洛伐克更加肯定。但，英格蘭果場，唔算默契又唔算悶波啦。之前夠有人話克羅地亞同西班牙會默契和波，結果克羅地亞反勝西班牙，不知幾好睇。仲有阿爾巴尼亞力克羅馬尼亞，匈牙利三度領先葡萄牙對手又三度追平，呢幾場好波，都係第三輪發生嘅。
悶波？有，但不只係尾輪。亦唔好忘記，以前賽事好多去到第三輪已經係例行公事，往往球隊篤定出線或出局。今次就多好多變數。
第四樣。會造就走線？其實真係冇的。因為，實在太難估。
證據？好簡單。有人走線，就唔會搞到德國英格蘭意大利西班牙法國全部在下線，5隊只能有1隊入決賽啦。馬後炮講，德國大可以悶和北愛，5分次名出線走去上線。但，明顯地變數太多，冇人夠膽。
歸根究底，搞到咁多強隊集中在下線，因為個別強隊唔爭氣。點估到西班牙英格蘭都雙雙次名丫。
輸少當贏 16造的禍
真係要我鬧？我就鬧16多啲。上面講咗令到個別賽事好沉悶，唔輸就得和波當贏。甚至係輸少當贏。例如最尾一場北愛落後德國1球，係完全冇打算點谷上去追和的。
點解？唔鍾意數佬都要講，當其時北愛落後1球，3場夾埋3分，得失球剛好係0。有人計過，晉級機會87%。亂咁搏想追和，一個唔該輸多兩球（冇人敢話德國冇呢種能力丫），變到得56%。咁你點揀？
並非所有第三出線 公平機會下嘅不公平
再鬧16，作者作為數佬，兼且有對稱強迫症，實在好怕見到4隊第三出線。A-D組，4隊首名對4隊第三合理。但EF組首名，要對其他組次名，所以意大利要對西班牙。同樣地，ABCF組次名對其他組次名，但DE組次名要對其他組首名喎。結論，ABC組着數啲的。
有人話，扯，咁你B-F組都係抽籤之嘛（主辦國法國必然A組），都冇唔公平。大錯特錯。呢種論調唔知點走出嚟。「公平機會下嘅不公平」都係不公。即係乜？即係我唔可以話，開賽前擲公字，擲輸果隊趕兩件出場先。「都係大家均等機會之嘛」。
今屆賽制比較唔好嘅地方，就係6隊第三名4隊出線，但，唔係同一日踢喎。你在最尾踢嘅，真係有啲着數。頭先北愛嗰個表，話3場3分得失球0，就87%出線──呢個係事前計的。實際上，當時AB組已踢完，阿爾巴尼亞3場3分但得失球-2，所以北愛落後一球時，邊止87%機會出線？根本唔會博。你話我偏心都好，A組阿爾巴尼亞，早早攤哂牌比人睇住食，真係唔着數的。
【九位球迷博客講波經就叻，估波又如何？不如睇睇佢哋嘅心水隊伍同預測！】
贊成24，但反對16，咁點？其實幾個方法：
24->12，即係冇第三名出線，然後12隊點玩再寫篇文研究，唔會太難。
24->8，乾手淨腳，夠刺激，睇少幾場。但變左得兩隊次名出到線，分分鐘仲煩過16的種種問題，搵嚟搞。
預咗你鬧，但我大膽提議，就不如32->16啦。即係世界盃咁咯。拖低賽事質素？我真係唔太擔心，你見24隊呢，真係咬得好緊，冇乜魚腩比人數，都唔係咁好玩的。拖長賽事？都預咗㗎啦。由細個睇8隊到而家24都係越拖越長。
當然，32隊嘅歐國盃仲會有好多其他問題，但我相信，係解決到嘅。下屆歐國盃直頭係巡迴演唱會，冇一個固定主辦國都夠膽死啦，踢多幾日真係冇乜大不了──反正又唔係我踢。
（本文純屬作者意見，不代表香港01立場。）