【01博客咁睇波】逢凶化吉　成就路維巧威威心理

路維係德國丁蟹，咁多人死唔見佢死。話佢命硬又好，天才又好，班球員實在勁又好，每次都總有人打救到佢。今次我原本已經寫定篇文想鬧路維，但佢首名出線，不失一球，又似乎好難點鬧。畢竟，戰績就係一切。

照舊，先講個故事。今屆歐國盃，德國分組賽打和波蘭後，名宿兼前隊長波歷克（Ballack）大肆批評德國隊，話佢哋冇領袖球員。路維（Löw）不以為然，反駁話：「超，聽到厭啦，2014 年夠話我哋冇領袖啦，我哋咪又係捧世界盃，然後就忽然個個都係領袖。」

捧世盃　炒意大利　波嘅嘢我哋識乜

誰是誰非不重要，佢兩個都反咗面好耐，但路維呢句說話出賣咗自己。呢個小故事話畀你知，路維在捧到世界盃後，信心爆棚，或者剛愎自用。非妄想症，但我有理由相信，爬入佢個腦入面，周圍都係呢句：「超，人人夠話咁咁咁唔得，我咪又係捧到世界盃，你咁叻唔見你捧盃？」

另一個故事係，德國今年 3 月主場友賽英格蘭，領先兩球下，半粒鐘反輸 3 球，相當難睇。呢場友賽後，德國就友賽幾十年嘅剋星意大利。有黑心德國球迷話，最好畀意大利大炒一場，否則路維唔會醒覺。我向來唔同意佢，但呢次就相當贊成。

結果？德國打破歷年宿命，4：1 大炒意大利，巧威威。唔使我講你都知，路維一定又係諗：「對完英格蘭你哋夠話點點點，結果呢？」

我接觸本地或外國嘅德迷，而家對路維評價都唔高。佢係捧到世界盃，但捧完盃後，佢嘅頑固變本加厲。球迷認為佢教咗 10 年，都應該變下。所以不少球迷其實都想德國畀人大炒一場，然後佢要落台。

中堅客串打閘都得？　偏偏一球不失

德國今屆陣式冇點變，長期都係 4-2-3-1（或有人話係 4-3-3）。人選變動亦唔多。路維今屆最叻仔就係後防改善不少，令啲批評者收口，又可以自我陶醉「人人夠鬧我防守唔得，我咪又係一球波不失」。

門將 Neuer 第 2、3 場冇乜嘢做，但第 1 場表現神勇。比起佢在拜仁季尾時，集中返好多。左閘Hector效力小球會科隆，成隊德國佢名氣可能最細。但佢表現相當好，由 2015 年開始場場正選，亦冇乜人質疑佢。

中堅第一場用西甲華倫西亞的 Mustafi，表現不錯，仲先開紀錄。之後兩場讓返畀傷癒復出嘅老大哥 Hummels，表現一樣出色。而更犀利係佢來季拜仁隊友， 3 場打正選中堅的 Boateng。此子歐聯被巴塞的球王美斯（Messi）玩到失平衡跌低，網上瘋傳。但我敢講 Boateng 係歐洲頂尖中堅之一，今屆分組賽甚至係賽事最佳中堅。留意佢唔止防守了得，仲係組織攻勢主力。一場波佢觸球傳波可以去到近 100 次，放 10 次準確長傳好等閒。

右閘位，係路維畀人鬧得最勁嘅。原因？因為佢連閘位球員都冇選，對，後備都冇。同世界盃一樣，佢搵咗打中堅嘅 Höwedes 客串打閘。「中堅打閘點解唔得？我世界盃都捧到呀！」但佢客串右閘真係唔多掂。防守都還可以，進攻真係波都未識斬。

阿彌陀佛，踢到第 3 場對北愛，路維卒之轉性，試用新仔 Kimmich 打右閘。拿，我早前講歐國盃新星篇博評就有提佢。原本打中場，拜仁屈佢客串中堅，而家路維搵佢客串右閘。OK 喎，特別係助攻方面，始終中場出身，腳下功夫好。但我幾擔心係，對北愛你就可以玩到右翼咁唔使返後，到之後對強隊，佢防守力又如何？

中場中路尚可　惟Khedira靠唔住

中場中路，其實相對地少問題。Kroos 踢足成季皇家馬德里冇抖過，但國家隊依然交到貨，作為傳球機器中場核心，全無問題。Özil 未在最佳狀態，但佢嘅創造力同埋忽然靈光一閃，足以令佢冇十足狀態都可以場場正選。每當賽事尾段空位多，佢就發揮更好。對烏克蘭補時嘅助攻就係例子。

近幾年德國畀人感覺係攻強守弱。今屆防守好似好咗，冇失過波，但進攻就差咗，3 場入得 3 球。

「勁過美斯」的Götze　夢遊當食飯

頭兩場路維安排快馬 Draxler 打左邊。可靠先生 Müller 打右邊。在拜仁不受重用冇場好波嘅 Götze 打中路，即所謂的「假 9 號」。出嚟效果幾災難，3 個都冇入過波，亦冇乜火花。

Draxler 有個人技術，但同隊友格格不入咁，粉絲如我都好難講好話。Müller 打右邊隱形咁滯，當然亦因為右閘 Höwedes 幫唔到佢。Götze 更加係夢遊球場。有心，但真係冇力。而路維肯定仲係迷信「你哋話佢唔掂？佢幫我拎世界盃冠軍」。對，傳聞話 2014 年世界盃決賽，Götze 後備上陣時，路維同佢講：「話畀世界知你勁過美斯。」結果 Götze 在加時入球靚波幫佢攞咗世界盃。然後就講到 2016 年都未講完。

攻力疲弱，第 3 場好歹變陣，除咗頭先提到右閘位球員唔同咗外，前線亦有調動。Götze 千夫所指，但路維依然用佢，只係將佢推去左邊取代 Draxler。中間出返球會狀態幾好的高佬 Gomez，Müller 照打右邊，但好多時行入中間。

出嚟，效果不錯喎。Gomez 本身繼續係「斷纜王」，拎親波就甩，射門又冇準，頭槌又頂唔到。但有佢掩護下，Müller 甚至 Götze 都多咗好多射門。唔係北愛門將表現好又有啲運仔，德國應該入到 3、4 球。

【九位球迷博客講波經就叻，估波又如何？不如睇睇佢哋嘅心水隊伍同預測！】

執迷不悟　八強收檔

比較令人擔心嘅係後備。德國應該有不少有質素嘅後備。但路維派上場嘅，係「小豬」Schweinsteiger，同埋 Schürrle。唔使好熟德國隊，都知小豬在曼聯傷多過踢，Schürrle 在德甲亦相當麻麻。但兩位都係路維契仔，亦係幫佢贏 2014 世界盃嘅老臣子。德國第一場換入小豬，好多球迷包括我，都講句粗口，但，偏偏小豬一入嚟就入波。路維又可以威威：「你哋話佢唔掂？我一出佢就入波。你識波定我識？」

公平講句，頭兩場表現未如理想，路維都有變陣，第 3 場效果似乎不錯。但，對北愛咋喎。最大問題係，根本唔知道真係變陣成功，定只係對手一心求和輸少當贏。

（本文純屬作者意見，不代表香港01立場。）