【01博客咁睇波】馬後炮: 歐國盃,令人最失望是英格蘭
歐國盃已經進入八強階段,係時候馬後炮下各隊表現。好多好意外既戰果出現過,亦有好多令人失望既球隊。
最失望:英格蘭。
作為香港人情意結,對英格蘭點都會有一種唔想佢輸心態。加上人腳絕對唔差,但得出嘅結果真係不能接受。
先睇前鋒,有史杜列治、華迪、卡尼、朗尼、拉舒福特。
再睇中場,有阿里、巴克里、迪亞、軒達臣、拉拿、米拿、史達寧、韋舒亞。
唔講後衛住,先講下英格蘭既中前場進攻體系。
中場方面,進攻中場有4個,防守中場2個,翼鋒1個,通天老棺1個。
前鋒方面,要餵波比佢先有用嘅前鋒有1個,自己爆到嘅有3個,霸住個波嘅有1個,未定型嘅1個。
以往英式足球一定係高Q大棍,但單睇入選名單嚟講,我相信鶴臣認為唔需要打依瓣波,第一,頂得嘅,得哈利卡尼一個,可以爆落底線出波嘅,勉強有占士米拿一個。唔好同我講史達寧,佢帶住個波都未知自己想點。由此可見鶴臣係想打地面波嘅。
好啦,地面就梗係要組織架啦;有拉拿、阿里、同巴克里,都尚算選中人,但我搵唔到邊個係重心,亦即係所謂可以壓到個場嗰個。但鶴臣好嘢,佢自己都知架,所以咪拉咗朗尼落嚟,做中場壓軍依個位。咁打地面波,打走位,就梗係首選靈活型前鋒啦,不過對唔住,為免俾對手睇透,啱晒咀型嘅華迪、史杜列治都唔出,放個哈利卡尼出嚟,問你驚未?
係人都知拉拿、朗尼、甚至米拿啲死球都唔弱,鶴臣當然都深明依個道理,所以,一切由哈利卡尼負責!頂波嘅重任就交畀史達寧同拉拿啦(係呀,你無睇錯,係史達寧唔係史摩寧呀)!
防守中場,為咗有更好嘅默契,所以出咗迪亞。今次鶴臣叻返次啦,起碼佢真係打到水準,仲有波入,不過我仍然覺得係軒達臣會好啲囉。
成個進攻體系,由選人開始就已經望唔透,令我覺得鶴臣係選咗人,先諗下用咩陣,而唔係一開始有晒計劃用咩陣先去選人。但認真,領隊嘅野,我識條鐵咩。好啦,講埋後衛,閘位有貝特蘭、獲加、路斯,同埋基尼。中堅就有史摩寧、卡希爾、史東斯。
其實我真係唔介意用晒後生仔,都要畀機會新仔架嘛。但講到打決賽周,係咪有個老將會好少少呢?唔一定要落場,但都係要壓到場,有經驗嘅,起碼會教下班後生仔嘛。
不過都係嗰句啦,帶隊嘅野,我識條鐵咩,不過如果我帶住依班人,我會咁排嘅:
華迪、史杜列治
拉拿、巴克里
迪亞、軒達臣
路斯、卡希爾、史摩寧、基尼
科士打
(本文純屬作者意見,不代表香港01立場。)