【01博客咁睇波】球星背後的女人：點止花瓶咁簡單（上）
自古以嚟，男人、女人、波（唔好諗錯隔離呀，係足球咋） 都係地球上不可分割嘅一部分。
但係好多球迷到而家，都可能只會講得出碧咸老婆叫維多利亞，最多加多個C．朗拿度有個叫伊蓮娜嘅 ( 前 ) 女友。
不過，其實好多 WAGs ( Wife And Girlfriends ) 同佢哋另一半嘅生活都相當精彩。
借住而家歐國盃舉行，我哋就喺呢24隊入面，幫大家搵左6個 WAGs界之「最」，等大家一齊做個「憤怒的葡萄」。
最中氣十足：Ilaria D'Amico
保方(Gianluigi Buffon)，千禧年代最強門將之一；而做得「保住後方」嘅女人，當然美貌與身材缺一不可，佢就係有「亞平寧半島第一美女」之稱嘅 Ilaria D'Amico。
到底 Ilaria D'Amico 有幾把炮？作為意大利 Sky Sport 嘅女主持，佢曾經被選為世界十大性感女主播之一；盛傳曾經同意大利「型佬」恩沙基 (Filippo Inzaghi）相戀；甚至乎連「咸爺」碧咸（David Beckham）都曾經同佢傳過緋聞，搞到「咸嫂」維多利亞（Victoria Beckham）下令老公唔准再接受 Ilaria 訪問。
當然，最厲害係佢以40歲之齡，成功打贏當時只有36歲、幫保方生咗兩個小朋友、已經結婚3年嘅正室兼「大婆」——捷克名模Alena Šeredová，令 Ilaria D'Amico 成為「小三」典範。可以成功令保方拋妻棄子， Ilaria唔駛講都知，又係天使面孔、魔鬼身材，再加上成熟女人獨有嘅韻味，真係迷到保方一陣陣。
咁到底佢有幾中氣十足？Well......平常就算喺球場上指揮隊友佈防企位都唔會咆哮嘅保方，就畀鄰居投訴佢同Ilaria 進行房事時，兩個人發出嘅「叫聲」過大，嘈音擾人清夢，俾各大報章大肆報道恥笑......
因為房事而上報紙，對保方嚟講都唔係第一次。話說 2010 年嗰陣，保方曾經長時間養傷，傳聞原因係當時老婆Šeredová 嘅性需求過大，而且經常要求轉換姿勢，搞到保方條腰頂唔住，要禁慾嚟加快康復進度......
雖然犯咗傳說中「每個男人都會犯嘅錯」，不過見到38歲嘅保方仍然「身壯力健」，「有心有力」，都未嘗唔係球迷之福嚟嘅......
最跟得夫人：Ludivine Kadri
「幾多對持續愛到幾多歲」，加上「男人有錢就身痕架啦！」，尤其無數球星都總係喺成名之後，就會替換身邊嘅另一半。當然，凡事都總有例外，有人成名之後都仲係從一而終，呢啲係咩？係真愛呀！
而真愛嘅代表不得不提，當然有法國右閘沙格拿同佢太太，Ludivine Kadri。
Ludivine 同沙格拿原來係青梅竹馬，喺14歲嗰陣已經認識。唔好睇沙格拿以前成個「鐵血戰士」look，原來佢一直都有同 Ludivine 約會，去吓街，直到去17歲嘅時候大家仲於確認彼此關係，拍拖相戀。而兩個人都係2010年修成正果，喺法國桑斯共偕連理，而家仲已經有兩隻叫做 Elias 同 Kais 嘅「化骨龍」係屋企添！
1988年出世嘅 Ludivine 有法國同阿爾及利亞血統，而家26歲嘅佢喺高中畢業之後就決定「嫁雞隨雞」，跟當時轉會阿仙奴嘅沙格拿一齊去英國，發展佢嘅模特兒事業，仲要同時修讀經濟課程！
最好打：Anna Stachurska
喺香港，一講起「好打得」嘅女人，好多人第一時間應該會諗起林鄭司長。不過講到WAGs界，最好打嘅相信非佢莫屬，拜仁慕尼黑前鋒羅拔．利雲度夫斯基嘅太太 Anna Stachurska。
有別於大部分球星另一半都係明星或者模特兒，運動世家出生嘅羅拔仔就鍾情於空手道運動員，又係營養師嘅「利雲嫂」Anna。兩人喺2007年出席華沙教育及體育學院一個學生講座時認識，起初羅拔仔仲以為人哋係芭蕾舞蹈員......
咁到底 Anna 有幾好抽呢？我唔直接答你，我用佢獎牌數目答你，喺波蘭國內佢贏過29面獎牌，喺世界賽攞過3面，更加喺2009年空手道世界杯入面攞咗季軍。都係唔信？唔緊要，我地一齊去片！
2010年，羅拔仔離開波蘭，轉會去到德國為多蒙特效力。兩口子要經歷分隔兩地嘅考驗，不過最終都收成正果，喺2013年結婚，仲要係豪使30萬歐元大搞！ (這些機會... )
好多球星係婚前婚後都總會有一兩單緋聞，不過利雲應該唔會 (唔敢？)有呢啲花邊新聞喇！
好！暫時就睇到呢到先。唔夠喉？之後嗰三個係邊個？咁就要且看下回分解喇！
（文：列奧Ｃ＠世界波）
（本文純屬作者意見，不代表香港01立場。）