【01博客咁睇波】德國贏意大利 祈求唔使再射12碼
作為一個德國球迷，見到德國晉級四強當然開心。
但作為一個作者，如果德國出局，篇文更加好寫。
呢場波，絕對係高手過招，細節定輸贏。
德國隊整體細節 OK，但最後幾乎就出事，尤幸意大利最後關頭更不濟。
我唔係先知 不過一早估到佢哋會射失
又係先講一個故事，風水佬呃你十年八年，小弟講嘢現眼報。
德國對意大利互射十二碼前，我在自己 Facebook 就點名呢 3 位——奧斯爾、「小豬」舒韋恩史迪加、梅拿。結果就係佢哋 3 個射失，亦只係佢地 3 個，中到應。冇睇開波嘅都搵片睇吓，冇鬧錯佢哋。奧斯爾都算，其實射得唔差，亦係 3 人之中我覺得相對地冇咁差嘅。小豬梅拿，到底射乜？
又不過，其實本人有幾神機妙算吖？奧斯爾十六強對斯洛伐克已經宴過客，梅拿代表拜仁慕尼黑，今屆歐聯四強對馬體會射失，間接成為出局罪人。小豬更唔使講，2012 年歐聯決賽，我睇電視睇住佢射失，直接成為出局罪人。唔止，對直布羅陀的外圍賽，佢一樣射失過。
好勁？完全唔勁。任何一個 OK 熟德國足球嘅都知道以上種種。德國足球隊比較早利用數據分析，以上嘅紀錄，助教知，球員知，教練路維亦都一早知。
射十二碼德國冇得輸 又畀路維過到骨
但，路維依然搵佢地 3 個射頭 5 輪十二碼。話畀你知乜？好聽，就係絕對信任佢嘅球員，「你今次一定得」。難聽，就係用人唯親，「佢唔掂我都係照用佢，你識乜？」。
上篇文已經話路維係德國丁蟹，逢凶化吉，今次又畀佢過骨。賽前好多人寫過，德國在大賽從冇贏過意大利。今次，總算以「國技」互射十二碼，淘汰意大利，叫做報仇成功，路維又有得威。
唔止，德國自 2006 年，連續 6 次大賽都入到 4 強，當中 5 次係路維帶隊（2006 年嗰次佢係助教）。本人保證，就算今屆 4 強出局，佢個位一樣定過抬炸彈。佢老哥張合約去到 2018，大家又可以睇多至少兩年。
要鬧路維，德國呢場嘅十二碼，其實射得極差。就算唔係佢哋 3 個射失我都咁講。極差都晉級喎？係，冇嘩眾取寵，只因意大利射得更差。
好多對德國隊的固有印象（識走線呀，好有鬥心呀之類），都冇乜科學根據。但話德國係互射十二碼專家，倒有數字證明。德國最近 6 次互射十二碼，全部晉級，史上唯一一次射輸係 40 年之前——1976 年，呢個紀錄應該獨步武林。
好誇張？仲有更誇張。今屆之前，德國唔止近 6 次射贏晒，仲要係 28 球只射失 2 球，對上一次係 1982 年。亦即係話，34 年嚟，冇一個人射失過。資深講波佬都話，從來冇見過德國有任何一個球員射失。
之但係，今屆對意大利，就呢 3 位仁兄射失，一晚就多過晒之前咁多年。咁你話，今屆射得好唔好？換着對面唔係射得更差嘅意大利，德國應該出咗局。
不過唔緊要，路維過咗海就係神仙，話佢好彩又好，下面班兵真係勁又好。總之任務已完成。我唔會做 underdog 話曉姆斯停賽，基迪拉同高美斯可能受傷，德國就四強止步。我信德國闖得過意大利，就應該捧到盃。但，重點係，就算四強出局，路維一樣穩如泰山。
德國意大利高手過招 路維變陣夠吉士
講返場波。賽前陣容一出時，我 wow 咗一聲。因為德國變陣，打三後防。嗱，真係對路維公平啲，對意大利世紀大戰佢都敢變陣，即係唔好變陣你又鬧變，唔變又鬧人保守。事實上德國傳媒有傳過呢場會打三後防，我都覺得 work，但畢竟德國今屆一場順過一場，打四後防咁多場一球不失，貿貿然變陣，要好大勇氣。唔好忘記 2012 年德國亦係對意大利忽然變陣，結果輸埋。
我都睇死路維唔敢，但佢敢，畀返少少掌聲佢。路維的三後防陣同我心水當然唔同，但無關係了。踢出嚟，呢個陣式唔算有太大問題。
意大利亦改變上場踢法，冇再喺前場緊迫德國。可能係顧忌德國的快速反擊，又或者自知體力唔係好夠。德國，亦一如所料，有控球，但威脅不大。德國亦怕意大利反擊，唔敢踢得太進取。總之，踢出嚟，頭 60 分鐘，係似高手過招，看似沉悶，但大家都搵對方弱點，希望一劍封喉。
意大利輸體力不足 德國贏冇大出錯
再一次馬後炮，到 60 分鐘左右，我就知道會開始有突破。60 分鐘發生乜事？意大利短時間拎咗 3 次黃牌。似乎係體力下降，集中不足嘅先兆。德國亦應該留意到，開始加快速度，65 分鐘就打開紀錄。最大功勞係第三場分組賽先拎返正選，助攻嘅高美斯，細節定咗輸贏。
德國領先後越踢越勇，原本見到意大利返魂乏術，但又係細節。高美斯近門企圖後腳入波，意大利門將保方救到，幫意大利吊住條命。唔止，高美斯仲要傷埋，之後德國就靜咗一輪。果然大難不死有後福，78 分鐘，意大利一次唔算太有威脅嘅攻勢，德國中堅謝路美保定犯錯，手球輸十二碼，意大利追返和，另一細節。
睇晒成場波，德國其實真係冇乜大出錯，係謝路美保定一下發波瘟。意大利受制於體力不足，守和 120 分鐘已有交代。德國算係踢得較好，值得晉級。我比較擔心嘅，係路維連射十二碼都玩用人唯親。係，我知小豬幫你拎世界盃。小豬今場早早就後備入替基迪拉，踢咗 110 分鐘，中規中矩。但，小豬冇幫你射贏過十二碼下話？
求神拜佛望路維唔好再搵呢 3 位仁兄射十二碼（雖然，其實其他球員都唔係射得好好）。否則，就要希望德國今屆唔使再玩互射。40 年嚟只有兩位射失嘅優良紀錄已經畀路維一晚敗咗，我唔想 40 年冇射輸過嘅金漆招牌都冇埋。
（本文純屬作者意見，不代表香港01立場。）