【01博客咁睇波】球星背後的女人：點止花瓶咁簡單（下）
【上回按此：球星背後的女人：點止花瓶咁簡單（上）】
最撲朔迷離：舒韋恩史迪加 & 伊雲洛域
一個係德國國家隊隊長、應屆世界盃冠軍；另一個係網球界前一姐、法國網球公開賽冠軍，Ana Ivanović（伊雲洛域）同舒韋恩史迪加（Bastian Schweinsteiger）呢對情侶可謂「真．冠軍級情侶」。不過，講到兩人嘅戀愛史，就真係相當撲朔迷離。「小豬」本身有位拍拖７年嘅索爆名模女友Sarah Brandner （係堅索！)；而娜姐自己嘅感情世界亦都精彩過電視連續劇，先後同過「行家」華達斯高（Fernando Verdasco）、高球手史葛（Adam Scott）拍拖、又同過網球一哥祖高域（Novak Đoković）傳緋聞。雖然兩個都係冠軍級運動員，但係佢同「小豬」應該大纜都扯唔埋。
神奇嘅事就係2014年發生，話說 30 歲生日嘅「小豬」，女友 Sarah 竟然無喺生日派對到出現，當時已經令人懷疑佢地係咪情海翻波。之後娜姐喺當時興起嘅「冰桶挑戰」之中，除左點名挑機費達拿（Roger Federer）之外，無啦啦就出現左「小豬」個大名，令兩人關係開始浮面。
到咗 9 月，「小豬」畀人影到喺紐約拖住位黑髮美女喺街頭行街，兩人表現親暱，經過查證之後，證實嗰位黑髮美女就係娜姐，兩人嘅情侶開係咁就公開咗，結果呢對「冠軍情侶」嘅誕生亦令到全球體育界記者同FANS為之震驚……
兩人而家都仲恩愛非常，「小豬」仲成日去撐娜姐場添。不過喺事業上睇嚟就要再加把勁，「小豬」仍然要喺經常受傷復出再受傷嘅情況下，搵返最佳狀態；而娜姐似乎繼續貫徹佢「戀愛好，成績唔好」嘅風格……
最引人入「性」：Ann-Kathrin Brömmel
就咁講，Ann-Kathrin Brömmel 你應該未必知係邊個，不過如果話係馬里奧．葛斯女朋友，你應該即刻知。然後睇埋個標題名，唔使我講，你都會話：「你一定又想講個張『早起的小葛斯有蟲吃』嘅圖啦」！無錯，確實又係嗰張應該會俾人笑足一世，但係相當貼題，最一望就知嘅圖。
恥笑完葛斯，係時候介紹下阿Ann。佢係德國北萊茵州人，15 歲已經開始「行天橋」，曾經參加過《Germany's Next Top Model》，一炮而紅，之後男性雜誌《FHM》嘅南美版就試過將佢評為年度女郎，而家係德國國內非常火熱嘅索模，喺2014年仲開始殺埋入樂壇發展添！雖然身高「只有」170cm ( 高過葛斯，好似係 )，但係叫得「索模」，細細粒不過身材超級勁，平時 Instagram 一張相閒閒地過萬人LIKE實在無難度。
葛斯近年喺拜仁嘅發展多少都有啲唔如意，喺國家隊又唔係必然正選，不過相信佢同 Ann 一齊就可以放鬆身心，事關阿 Ann 喺訪問入面就深明要留住一個男人唔係要綁實佢，反而係畀佢有適當嘅空間，完全無畀婚姻壓力佢，「我係葛斯女友，但係暫時無諗過要做佢老婆，因為我仲有好多目標要達成」。樣靚，身材正，善解人意......(下刪一百字)，叫葛斯如何可以不愛她呢...？
最扑扑脆嘅滄海遺珠
唔好以為正嘅 WAGs 只會出現係傳統強隊，又或者一定係球星同靚仔身邊。就好似三戰不勝出局嘅羅馬利亞咁，對佢嘅認識除咗赫傑、彼德斯古、梅度同捷禾之外，已經要去到今屆嘅隊長雷特，更加唔好話到底佢有邊個球員結咗婚、或者拍緊拖……
而家效力緊國內球會布加勒斯特戴拿模嘅 22 歲左閘史迪利安奴．菲臘（Steliano Filip），同佢個已經拍咗兩年拖嘅靚靚女朋友 Bianca Marina，就堪稱係羅馬利亞今屆歐國盃最大發現。
94年出生嘅 Bianca 今年先只有22歲，兩個都係羅馬尼亞人。不過……由於小編唔識得羅馬尼亞文，只係知道佢贏咗個叫「Miss Heaven Noiembrie」嘅選舉 ( 又Miss又天堂咁，應該都係啲選美會啦……)，喺2011年又曾經贏過一個好似幾重要嘅獎，叫「Miss Popularitate la FashionTV Banat 2011」……總之就係贏咗幾個比賽啦！
其實講咁多都唔重要，總之就「青春 + 靚 = 正」啦。有圖有真相，睇相啦！
（文：列奧Ｃ＠世界波）
（本文純屬作者意見，不代表香港01立場。）