好多女仔想上網學防狼術防吓身
男男女女都應該識去保護自己
但唔係上網睇文
其實好多人都問過我有無幾招俾佢地防下身，次次我都支吾其詞，最後都係話「講少少基本嘢唔係問題，但唔好以為一定防到身，亦唔好當防身去聽」。呢種冷水都潑咗無數次，潑到好多人以為我收收埋埋。唔係呀，我唔係收埋呀，係我唔識點教呀，而且，我最驚嘅係俾咗錯誤觀念人哋。
以下我防身/防狼術會混用，兩者技術上、集中點可能有差異，但對我嚟講兩者來核心係一樣嘅，下面亦有講點解。
網上學嘅問題
首先第一個問題，點解我唔網上講防狼術？
我先唔講我對防狼術嘅睇法，只講網上學防狼嘅問題。現時好盛行網上學習，我亦覺得好多嘢係可以喺網上學習。地理、歷史、物理等等知識當然得啦，連運動都有好多可以學到，好似跑步、健身之類。有位標槍手喺youtube自學標槍最後勁到去奧運，所以喺網上學運動肯定係得嘅。但點解我認為網上學拳效果好麻麻，而直頭唔想講防狼呢？
第一，打拳係兩個人嘅事，防狼都係兩個人嘅事，你會唔會睇完防狼術篇文去練返幾個鐘先？如果你網上學打拳係for一個人練keep fit嘅，無問題，大把俾你選擇。但如果你想防身，單純睇兩次係絕對唔夠嘅。如果你唔練，先唔理嗰個技術有幾legitimate，你根本就發揮唔到你睇嗰個技術。
第二，最驚嘅就係你睇完之後，以為自己防到狼，喺緊急嘅情況下做錯決定。跑步跑錯，係會對關節唔好，但未至於有生命危險。但係俾人侵犯嘅時候，網上學嗰招又係唔係岩用？喺嗰種危險嘅情況之下，你網上學嗰下技術又得返幾多%用到出嚟？會唔會你以為自己打得贏，所以做錯決定唔逃走？
就好似睇youtube學游水，但未游過，又以為自己游到一樣，係一件好危險嘅事。
舉個例子俾大家，你去google打防狼術，見到有藝人教用double leg takedown防狼（我估唔係位藝人講而係其他人寫，不過算啦），都係嗰句，唔係話唔得，你一下摔暈人梗係得，但機率好低。你摔低人之後，如果對方唔暈，你地一齊係地，佢又大隻過你，真係一個防狼好技巧咩？如果摔唔到，你衝埋去，咪俾人攬實？如果有人睇完信咗，有事起上嚟真係用，咪更危險？
一定唔得嘅防狼/防身術班
首先，我無參加過出面防狼同防身術嘅班，所以我唔知情況，唔多評論。
但如果你第一堂，入到去，教練話學完呢個班，就可以保護自己，唔再怕色狼，唔再怕街頭衝突，你可以即時舉手要求退款走人。另外，如果花好多時間教你空手奪刀呀，俾人用槍指住個頭嘅時候奪槍呀，你都可以要求退款走人。
所有技術都係講機率，並無一個技術成功率係百分百，更無一個武術體系可以肯定保護自己。奪刀，空手對武器之類，唔係話完全無可能，但成功率極之低，死幾十次都唔知成唔成功一次，練嚟浪費時間。
咩技術先係防狼/防身術？
嗰種人哋抓住你件衫、抓住你隻手，你要揈開佢嘅技術，學吓肯定係好；插眼撩陰打喉嚨，可能都係好方法，我亦相信外邊有好嘅學校會教導呢類技術。但係防身/防狼最後都係返返去一個字：走。
走、大叫同搵人幫手，對喺香港生活嘅人來說，係防身最重要嘅三個技巧。無錯，你話夜晚荒山野嶺如果有人襲擊你，走唔得去邊、叫又無用、亦搵唔到人幫手，但係我想問你有幾多時候夜媽媽會去荒山野嶺？
同時，我亦唔係話外間嘅防身技術完全無用，去學係好嘅，但唔好有個心態覺得自己可以打贏襲擊者，所以唔洗走。就算你真係打走咗佢，你都好應該盡快跑走安全地方報警。
防身，對我而言得一個重點，就係安安全全，無穿無爛返屋企。所以俾人用刀指住，要你俾錢佢，我覺得俾錢係個好好嘅防身方法。聽落好唔威，但係我覺得無咗條命仲唔威。俾人搶錢頂多都一千幾百，你條命肯定唔只呢個數目。你老婆你老公最擔心係你安全，嗰種情況都安全返到屋企，對你另一半而言，最威一定係你。
唔好誤會，以為我覺得次次都要硬食。於我而言，錢財身外物，破財擋災無問題。但如果對方一嚟就想攞命，或者傷害你身體，係第二回事，呢個時候防身/防狼術嘅技巧可能救到你，但防身/防狼術並唔係上網睇兩次就會識。
今次係咁多！
（本文純屬作者意見，不代表香港01立場。）