UFC 205喺香港時間上星期日舉行亦係紐約州自1997年通過法例禁止MMA比賽後，第一次舉行MMA比賽但因咩事會禁咁耐？

香港時間上星期日，Conor McGregor成為第一位同時擁有兩條UFC冠軍腰帶嘅拳手，但今次唔係講佢。今次要講嘅係比賽嘅地方，即係紐約。

今年4月，現任美國紐約州州長Andrew Cuomo簽署法案，令紐約州成為美國最後一個MMA比賽合法化嘅州份。紐約由1997年開始就唔搞得MMA比賽，終於解禁。

大家可能問，乜紐約州原來唔搞得MMA比賽㗎咩？係呀，個原因仲要好有趣。

因為太危險？

美式足球、拳擊呢類運動，同時存在風險，點解唯獨係禁止MMA比賽？如果係因為MMA實在太危險，就應該每個州都會禁，而唔係得一個州。況且，MMA根本就唔係大家想像中咁危險（激戰入面嗰句：「打MMA會死人㗎」真係令好多人誤會），但呢方面可以搵日再講。

按UFC，即係美國最大嘅MMA比賽公司嘅員工話，喺紐約州唔搞得MMA，係因為Culinary Union（廚工工會）。

廚工工會？關MMA咩事？

Culinary Union（廚工工會係我直譯，本來想用餐飲業，但香港餐飲業會用catering，所以用餐飲業唔係太好），全名Culinary Union Local 226，係一個有勁多會員嘅工會，而賭城拉斯維加斯當中，有好多個賭場嘅員工都係呢個工會嘅會員。

而Frank Fertitta同Lorenzo Fertitta呢兩兄弟，就係UFC嘅老闆。佢哋除咗擁有UFC之外，仲有間賭場，叫Station Casinos（其實唔完全係佢哋嘅，但佢哋兩個加埋有過一半股份）。最大嘅問題係，Station Casinos並唔喺廚工工會入面。

簡單講，唔入公會就唔friend。咁岩呢個Culinary Union隸屬於一個叫UNITE HERE嘅勁勁勁大工會，而UNITE HERE喺紐約州有成差不多9萬個會員，影響力之大，大家可以想像到。有工會支持嘅政治人物，當然會為工會說話，咁唔俾嗰啲「唔friend底」嘅人喺工會地頭做生意，都係件「合理」嘅事吧。

Sheldon Silver，前任紐約州議會議長 （Speaker of the New York State Assembly），被認為係阻止MMA於紐約合法化嘅一個重要人物。佢喺2011年夾埋UNITE HERE一齊反對MMA於紐約州合法化，同時被指用手段令法案去唔到投票程序。

以下係2011年，A09879／S01707-A法案嘅紀錄：

不過Sheldon Silver喺2015因貪污俾人拉咗，然後法案就通過到，巧合？你信唔信？

政治與武術

講咁多，其實係想講，不論係搏擊運動，定更為廣泛嘅武術，都同政治、社會、文化有關。好多時，運動規則嘅改變，除咗因為運動本身之外，都可能有政治、文化因素喺入面。武術宏觀而言，認為係文化載體又好，定本身就係文化嘅一部份又好，從來都唔可以同以上因素分開去睇。

今日係咁多！

（本文純屬作者意見，不代表香港01立場。）