【足球．博評】從比利到碧咸：美職點止養老咁簡單
美國人將運動商業化，相信佢認第二，無人敢認第一！
佢哋將唔少運動，包括美式足球、籃球、棒球同冰上曲棍球都搞得好成功，唔止係職業聯盟，仲甚至連NCAA高中比賽都可以搞到有聲有色。
但喺足球界，美國就曾經被稱為足球沙漠，而近年MLS嘅發展愈嚟愈快，佢哋嚟到鎂光燈前得到關注，其實並非一朝一夕，究竟MLS可唔可以喺美國上升到好似NBA嘅高度？
文：洛迪高@世界波
曾效力英超嘅愛爾蘭前鋒羅比堅尼（Robbie Keane）宣布離開美職聯（MLS）球會洛杉磯銀河後，英格蘭雙特林伯特（Frank Lampard）同謝拉特（Steven Gerrard）都分別離開效力嘅紐約城及洛杉磯銀河。不過好彩，仲有唔少球星踢緊（例如韋拿及派路），而且似乎仲會有更多更年輕嘅球星來投！但喺展望未來之前，不如先回顧一下美職過去一段都可謂相當光輝嘅歷史……
- 洪荒時期 -
講緊嘅係唔止未有MLS，仲要係比利（Pele）、碧根鮑華（Franz Beckenbauer）、告魯夫（Jordi Cruyff）同佐治貝斯（George Best）踢波嘅年代。
當時美職仲係叫「北美足球聯賽」，比利喺1975年加入紐約宇宙隊，雖然已過最巔峰狀態，但表現仍然唔錯，出場79次仲可以攻入57球。
比利嘅成功吸引到其他球星其後到美國發展。「凱撒大帝」（碧根鮑華）喺1977年做比利隊友，仲踢咗4季，加盟第1季就成為最有價值球員。同期仲有荷蘭球王告魯夫同佐治貝斯加盟洛杉磯Aztecs，令一向喺美國唔太hit嘅足球都一時興起。
雖然球星們大部分都過晒巔峰時期，去美國養老，但好似紐約宇宙隊最受歡迎時期，每場比賽平均有4萬人睇，都算喺美國推廣到足球。
不過，因為1980年代初經濟蕭條，球隊數量同球員人工卻不斷急升，搞到大部分球會都蝕本，北美足球聯賽終於喺1984年葬身歷史洪流。到1996年先出現MLS，但已經唔似1970年代咁受歡迎。
- 萬人迷君臨 -
直到2007年7月1日，一單堪稱全球最轟動嘅轉會消息令MLS再次成為焦點：萬人迷碧咸（David Beckham）以32歲之齡由皇家馬德里轉會到洛杉磯銀河，令一眾覺得咸爺仲可以喺頂級聯賽立足嘅人跌晒眼鏡（咸爺幾次返歐洲踢波都證明佢哋嘅諗法係無錯）。咸爺就話想去美國幫手推廣足球文化（順便做響自己品牌，為佢同太太日後發展鋪路）。
既然有位大人物嚟到，MLS都不敢怠慢，待遇當然不能太差，但MLS本身設Salary Cap，如果要請球星，其餘球員就惟有揀平啲同水準低啲。鑑於此舉可能會拖低聯賽水平，所以有關方面特意設立「碧咸條例」，容許球隊中有3位球員薪金不受Salary Cap限制，以便吸引巨星。
講起着數，要知道碧咸嘅條款入面，仲包咗一項畀佢以四分一價錢，即2,500萬美元買下美職球隊特許經營權優惠，而咸爺亦密鑼緊鼓喺邁阿密搞新球隊踢美職，仲想搵埋伊巴謙莫域添，都算有心囉！
- 巨星紛至 -
碧咸珠玉在前，巨星加盟MLS意欲提高咗唔少，之後唔少球星都選擇喺職業生涯較後日子去美職聯。其實唔止係出名球星，仲有一啲喺歐洲主流聯賽搵過食嘅球員，例如德國門將Frank Rost，甚至係「同喺主流聯賽搵過食嘅球員有關係嘅人」，如伊恩胡禮（Ian Wright）個囝囝巴利（Bradley Wright-Phillips），亦即係胡禮菲臘斯（Shaun Wright-Phillips）個細佬，缺乏頂級聯賽經驗嘅佢仲踢得唔錯添，連埋今年，已攞過兩次神射手榜第一名！
至於本身係球星嘅，就有加盟紐約紅牛嘅亨利（Thierry Henry）同卡希爾（Tim Cahill）、洛杉磯銀河嘅羅比堅尼、蒙特利爾衝擊嘅杜奧巴（Didier Drogba）、紐約城嘅韋拿（David Villa）、派路（Andrea Pirlo）、奧蘭多城嘅卡卡（Kaka）與及文初提及嘅「雙特」等等。當然唔止MLS，次級聯賽嘅北美足球聯賽都吸引到魯爾（Raul）呢位前西班牙金童來投（當然好大程度係因為紐約宇宙呢支球隊）。
雖然開頭佢哋都畀人話只係嚟養老同掘金，但其後佢哋專業同球技都可以幫助到球隊。其中最具爭議嘅林伯特，因為借咗去曼城畀人覺得佢根本唔想踢美職，仲喺MLS初登場時受到不歡迎對待，不過隨住呢季入球不斷，已漸被接受，仲試過憑帽子戲法贏盡歡呼聲！
曼皇大戰證美足有得做
其實老將們能夠有咁嘅表現已經好難得，試想像下MLS作客旅程，舉西岸嘅洛杉磯銀河為例，如果佢哋要去作客紐約紅牛，要坐5個鐘頭內陸機，仲要適應3個鐘時差……
睇返MLS今季暫時統計平均入座人數有21,692，比上季21,574多少少喇，都叫有進步；電視轉播仲勁，ESPN統計今季收看人數有307,845，比上季多成25%！最壯觀嘅係喺2014年季前賽曼聯對皇家馬德里，多達109,000球迷去咗密歇根球場睇波！
然而講到聯賽發展，MLS當然想少啲老將，多啲當紅巨星或者新星來投，就好似效力FC多倫多嘅意大利國腳基奧雲高（Sebastian Giovinco）！可以點樣做？對於美國人搞運動，可以放心啦！唔好忘記佢哋發明過一隻類似12碼決勝負嘅方法㗎，講諗頭對佢哋嚟講唔難，再加上將運動商業化嘅頭腦，相信美職發展應該好快可以更上一層，令觀賞性更強！
同場加映那些年美式12碼，5秒內進攻球員同龍門1對1（洛迪高其實都幾鍾意呢個方式，好玩呀！）：
P.S. 對於上一篇文章：《德甲護級爭櫈仔 漢堡有無關愛座？》誤寫德國後防賀維迪斯（Benedikt Howedes）曾效力漢堡，洛迪高僅此致歉，並承諾往後會做得更好，繼續為大家努力帶上更好的文章。
（文章純屬作者意見，不代表香港01立場。）