今次好短，純粹發洩唔關鄭嘉穎同《鐵馬尋橋》事

武術同音樂一樣，並唔只係文化載體，因為佢地本身就係文化嘅一部份。大多數地方都有自己嘅武術，亦有配搭武術嘅音樂。泰拳、巴西戰舞/卡波耶拉（Capoeira，唔好同巴西柔術搞亂）都有自己嘅音樂。中國武術都有自己嘅傳統音樂，which is nice，無問題，但點解成日都要用「男兒當自強」？

恐防大家唔知咩係《男兒當自強》（其實無可能），大家可以聽聽：

《男兒當自強》係林子祥嘅歌，作詞係黃霑，曲改編自古曲《將軍令》。隻歌咁紅，而且會同中國武術有咁深嘅關係，係因為呢首歌係李連杰套《黃飛鴻》嘅主題曲，第二集仲直接叫《黃飛鴻之二：男兒當自強》。

林子祥當然無問題，佢嘅歌我成日聽，隻《Lamusique》直頭無得頂。霑叔嘅詞就更唔洗講，論文采又有幾多人能夠望其項背？

只不過，不論係粵語版、國語版（成龍唱）、定原典將軍令，我都唔係好頂得順。情況就好似聽得太多次《My heart will go on》，或者《Let it go》一樣。首歌唔係話唔好聽，而係聽咗太多次，真係太多次啦。放過我啦！

每次見到有表演，行埋去睇嘅時候，我都會暗暗希望「唔好播《男兒當自......」，但通常連個強字都未諗到，就已經開始「凳凳凳凳凳凳凳凳」，而每次開始「凳」我就已經想轉身走。唔係玩國術就一定要《男兒當自強》嘅，下話？

當我以為再無其他歌會咁嘅時候，就即時出現挑戰者：

好啦，呢首未到《男兒當自強》嗰個位，但都就快。但講真，我呢世都唔想再聽到《男兒當自強》。

今日係咁多！

（本文純屬作者意見，不代表香港01立場。）