大家好耐無見！雖然初十都過左，但都祝大家身體健康，多做運動多飲水。

睇李兆波先生篇文，問「為什麼是熊本熊而不是獅本獅或龍本龍？」，個答案其實可能係因為香港廣告都係一兩條方程式。

唔知由幾時開始，香港嘅廣告、電視節目，都要關武術事。唔係關打事，就要關大俠事。

例如交通安全：

建造業議會：

航空公司（班空姐學詠春自衛，都叫有個解釋）：

痴線到為咗食《基本法》隻字都要打功夫：

其實仲好有多，早排先喺九鐵見到銀行活動都要拉埋打功夫事（如果係打拳event另計）。當大家以為玩完國術，應該就完啦？梗係唔係！

我十分支持曹星如，同時樂見搏擊運動員可以賣咁多廣告，更唔怕成日見到佢，但諗廣告可唔可以俾少少心機？可唔可以唔好次次都「香港人精神」之後就曹星如打拳打沙包，打完就yeah？一係就「打不死精神」，影佢訓練好辛苦呀、同人對打口腫面腫、最後舉條腰帶yeah？

有人會話：「搵得曹星如，梗係叫佢打拳啦！」我又唔覺。其實一個拳手都有其他生活，唔係一定要影佢打拳先知佢係拳手。成個香港都知佢係拳擊運動員架啦，有邊個唔認得呀Rex呀？唔通佢唔打拳你就唔認得佢咩？

情況同搵Ben Sir拍廣告一樣，件事一定係搵佢扮鬼扮馬之後叫佢教廣東話，畫面再有粵音音節，例如「武 mou5」「術 seot6」之類。我估佢哋開會個情況應該如下：

其實你要知粵音，去粵語審音配詞字庫咪得囉。

當然，亦開始有公司突破呢個框框，曹星如終於唔洗一出場就打拳。

今次係咁多！再次喺到祝大家雞年平安大吉！

（本文純屬作者意見，不代表香港01立場。）