李斯特城極速炒領隊,打工仔有乜啟示?

撰文:李聲揚
出版:更新:
拎返舊年嘅「分析」睇,包保笑大你個口。除咗陳腔濫調嘅努力可以成功 (踢英超邊個唔努力?)外,仲有就係雲帥點領導有方,唔畀壓力球員又係優點,就連贏波食Pizza又係成功之道(必然激死嚴控球員飲食嘅真名帥哥迪奧拿)。
李聲揚
李斯特城奪冠時,出現不少「努力可成功」的「分析」。(Getty Images)

放心,呢篇唔係講波,係講打工,講做人。

先嚟個極短篇故事:

兩隻蝸牛爬獨木橋過河,爬左大半日,過到對面岸。忽然條橋就塌咗。蝸牛A就同蝸牛B講:好彩我哋平時多練習,爬得夠快咋。

心靈雞湯畫出腸嘅故事教訓:

庸才總係將幸運當係自己嘅才華同努力。

舊年五月,小球會李斯特城(下稱「李城」)童話式拎英超冠軍,Facebook上洗晒版,報紙唔止體育版講,連經濟版娛樂版政治版都有人講,個個專欄作家專家上身,事後諸葛亮話你知李城成功有乜啟示,雲尼亞里有乜過人之處。連我上股票吹水節目,監製都叫我講兩嘴。

就連曾俊華都出嚟講,李城封王係「香港本色」,只要努力就可以克服到困難,冇嘢唔可能喎。夠晒薯片,即食廉價又冇益。但冇所謂,讀者鍾意垃圾食物。「香港本色」?夠晒大吉利是。因為李城今年踢到一鑊泡,執筆之時排緊尾三,分分鐘要降班。領隊雲尼亞里(下稱「雲帥」)3月都未到就畀人炒魷, 快過董建華腳痛。

而家樣樣要快,八點拎冠軍九點要分析出街。但我鍾意「讓子彈飛一會兒」。試下拎返舊年嘅「分析」睇,包保笑大你個口。除咗陳腔濫調嘅努力可以成功 (踢英超邊個唔努力?)外,仲有就係雲帥點領導有方,唔畀壓力球員又係優點,就連贏波食Pizza又係成功之道(必然激死嚴控球員飲食嘅真名帥哥迪奧拿)。

事實上,李城護慣級啦,之前降班添。對,上年冠軍嘛,但冠軍係常態,定護級先係常態?1賠5000大冷門,仲唔係雲帥神機妙算?但,六合彩都期期有人中啦。1賠5000跑出,就代表個領隊好勁?唔係其他因素?

知唔知真勁人同行運超人有乜最大分別?就係穩定同可持續性。費格遜人人稱許,因為佢帶領曼聯皇朝封王N次。摩連奴聲望咁高,因為佢帶幾隊波都掂, 唔係一季冠軍。你身邊大把人話自己股票賺幾個開,就算冇吹牛都好,點解畢菲特同彼德林治先係股神?因為人地keep住咁多年都有貨賣,唔係一年扑中一隻升幾倍然後出嚟認叻。

人嘅弱點就係鍾意聽勵志故事,「只要努力就得」,但你再努力都唔會變C朗拿度,努力係必要條件唔係充份條件。雲帥唔係球壇素人,佢之前教十幾隊波,基本上係一無成就。教華倫西亞更加人人皆媽,教希臘國家隊教到主場輸比法羅群島(邊位讀者去過?),外圍賽包尾出局。有話今年主將簡迪離隊所以球隊即時走樣,如果係真,咁雲帥舊年有幾大功勞咁大把?

舊年5月本地媒體吹捧李城同雲帥「只要有夢想」嘅成功之道,《經濟學人》 (Economist)就有篇文,講Underdogs are overrated。李城奪冠?值得開心,但唔好上綱上線搵啟示,更唔好信咩「只要有夢想」。對,一盤冷水淋落嚟, 但苦口良藥,呢啲先係值得睇嘅文章。 

篇文講唔好因為一個百年一遇嘅偶發事件,就以為人人可以唔理自己實力咁去發夢。如果吹大參加者嘅得勝機會,叫人「追夢」係好事,咁拉斯維加斯就功德無量,造福人群。事實係咪呢?

雲帥之前教十幾隊波,基本上一無成就,上年威返一次又能代表什麼?(Getty Images)

雲帥嘅剎那光輝唔值得過度吹捧,反而之後嘅事先值得研究。佢由半紅不黑打十幾份工冇份長,到忽然扑中冠軍獲獎無數,到極速被炒,英雄變狗熊一年唔夠,對高級打工仔有乜啟示?

第一,都係嗰句,唔好將成功全部歸功於自己,記住幸運女神在笑。特別第一次成功嘅,真係唔好將自己放到咁大。外國調查話你知,好多酒店房嘅溫度控制係流嘅,好多電梯嘅閂門掣都係流嘅,就連交通燈都未必因為你不停按會快啲轉燈。你可以控制到嘅,比你想像中少。世事無常先係真理

第二,一朝得志唔好語無倫次,唔好得罪咁多人。呢樣嘢雲帥做得幾好。佢教咗十幾隊波都冇掂過,忽然成為大師,可能都有時懷疑自己係咪咁有料。亦因為佢只係一剎那光輝,所以言行舉止都唔似「冠軍領隊」,唔會串串貢——咁至少佢折墮時,都大把人替佢不值,而唔係踩多腳,記者亦手下留情,唔係人人開香檳。

第三,小心你啲下屬,特別係冇共患難過嘅。好多嘢你控制唔到,頭號馬仔要走人你都冇法,球員要加人工大老闆(班主)唔肯你都冇法。但唔好當球員真係你忠心子弟。雲尼都係2015年先上任,大家萍水相逢之嘛,又唔係你帶佢出身。你估啲主將會唔會覺得自己根本有料唔關雲帥事?聽聞大把人同班主篤佢背脊。同下屬打成一片好,但要居安思危。

第四,有得咬大大舊時好咬。時光倒流返兩季之前,同你講李城要護級,班主會好意外?要個領隊祭旗?但壞在舊年做得好嘛。就算唔係要你今年都冠軍, 期望都唔同啦。而呢樣嘢,打工仔邊控制到?所以拎到好業績,記得大大力要加人工出花紅,跳埋草裙舞拍埋枱在所不惜,「我係冠軍領隊大把人搵」。因為,你今年做得好,超越目標,下年大老闆嘅目標就更高,直到有一日超人都搞唔掂為止。呢啲就係打工仔悲歌。花無百日紅,有得咬時當然大大力咬,否則第日你畀人炒之後一定後悔。

最後一點,老生常談,但患難見真情。富貴時梗係多朋友,但你拎咗冠軍先黎分析「雲帥哲學」嘅,只係趨炎附勢嘅小人,或求其搵嘢寫嘅花生客。朋友應該支持你追夢,但唔係到你有成績先話「我一早睇好你」,反而係應該在你意氣風發時提醒你。

古羅馬將軍凱旋回歸接受群眾祝賀時,會有個奴隸在佢後面提佢「Respice post te. Hominem te memento」,大意即係「睇住收尾嗰幾年,你都只係個人」。成功時你需要嘅唔只係錦上添花,而係忠言逆耳嘅真朋友。

(文章純屬作者意見,不代表香港01立場。)