【中超.博評】拒絕轉會中超的他們

撰文:世界波
出版:更新:

近期轉會窗焦點當然係愈嚟愈高嘅轉會費,而最令人「驚」訝,甚至令名宿不齒或激烈討論嘅,係中國球會嘅「金元攻勢」及唔少球星都「屈就」中超。
隨着習大大嘅足球「中國夢」愈講愈Hit,相信中超投資只會有增無減,而願意由歐洲主流聯賽過檔嘅球星都可能愈嚟愈多,不過有唔少球星甚至巨星都拒絕過中國球會邀請,等洛迪高同大家細數一下!

隨着習大大嘅足球「中國夢」愈講愈Hit,相信中超投資只會有增無減,但亦有唔少球星甚至巨星都拒絕過中國球會邀請。(資料圖片)

文:洛迪高@世界波

  朗尼-鬥心仍在

隨住朗尼(Wayne Rooney)發表聲明,簡短地話自己願意長期留效曼聯後,朗尼投中超嘅轉聞先止落幕,當時甚至連現任中超球會天津權健教頭簡拿華路(Fabio Cannavaro)都講埋曾聯絡過朗尼。雖然朗尼今季終於失寵,但無人質疑過佢嘅鬥心,包括佢自己。縱使中超嘅合約隨時令佢成為全球最高薪球員,不過佢仍覺得自己仲有能力喺頂級聯賽角逐,所以佢轉投母會愛華頓嘅可能性比去中超仲大!

雖然早前有三家中超球會向其招手,但朗尼決定留在曼聯。(Getty Images)

  伊巴謙莫域-恩師魅力

戰神伊巴(Zlatan Ibrahimovic)完咗巴黎合約後都曾經有中超邀約,甚至到依家都仲有相關傳聞,不過伊巴當摩連奴(Jose Mourinho)神咁拜,當初摩佬一個電話就令伊巴決定投曼聯,嚟到依家雖然仲未同曼聯續約,不過摩佬都好有信心佢仲有能力留喺曼聯踢多兩年,唔會去中超咁話,咁恩師都咁講,伊巴睇怕都做多一排紅魔鬼。

伊巴謙莫域(Getty Images)

  梅頓斯-報親恩

效力拿玻里嘅比利時翼鋒梅頓斯(Dries Mertens)近來狀態火熱,當然吸引中國球會注意!不過梅頓斯係孝子,雖然話中超開嘅待遇好好,令佢仔女甚至孫仔女都唔洗憂。不過梅頓斯就話,佢當時於安德烈治任職巴士司機嘅老豆喺自己11-18歲期間,次次都親自送佢去布魯塞爾練波,所以梅頓斯都要做孝順仔講:「佢哋咁樣做唔係為咗錢咁簡單,我去中國的話佢哋會失望!我老豆對我引以為傲,我希望佢可以繼續咁!」係嘅,明嘅,有啲嘢係用錢買唔到。

梅頓斯(路透社)

  洛賓 - 不屑中超

效力拜仁慕尼黑嘅洛賓(Arjen Robben)都出埋聲,講明職業生涯去到盡頭先考慮去中國。佢話:「去得嗰面基本上宣布你職業生涯已經去到盡頭,我就想踢得幾耐頂級聯賽就踢幾耐。」

洛賓(路透社)

  卡連歷 - 「我不值」

至於效力意甲費倫天拿嘅克羅地亞前鋒卡連歷(Nikola Kalinic)都曾經受中超球會垂青,而嗰個球會就係上面提過,由大簡帶領嘅天津權健,佢哋願意為卡連歷付上5,000萬歐元(約4.1億港元),觸動解約金條款,不過卡連歷就好謙虛咁拒絕咗。佢話:「簡拿華路打過畀我,但而家已經塵埃落定。嗰陣只要我同意就完成交易,但我唔值解約金條款個價,我都唔敢講會有人肯畀呢個價買我…我唔係十分清楚佢哋嘅條件,但錢唔係大晒。」事實係喺中國呢個國度,冇野係冇可能,卡連歷你太天真了…

卡連歷(路透社)

  皮耶 - 另類忠誠

當年頭皮耶(Dimitri Payet)扭計要離開韋斯咸時,好多人都可能佢只係扭計想搵多啲錢或者想轉會賺高啲人工,中國球會都可能有咁嘅「以為」,不過皮耶對轉會馬賽好堅定,本來喺鎚仔周薪有12.5萬英鎊(約120萬港元)嘅佢,返馬賽時估計反而要減薪。

皮耶(Getty Images)

  亨特拉爾 - 家人至上

效力德甲史浩克04荷蘭前鋒亨特拉爾(Klaas-Jan Huntelaar)原來都有中國球會邀約,不過獵人就話多多錢都可以令佢離開家人去到山卡拉地方踢波。啱嘅,無理由要屋企人飛到咁遠「團聚」嘛…

亨特拉爾(Getty Images)

  辛迪加斯 - 自我救贖

咪以為中國球會只會向大球星或新星埋手,事關就連韋斯咸嘅29歲蘇格蘭中場辛迪加斯(Robert Snodgrass)都係目標!不過佢早前試過重傷長抖,而家希望喺英格蘭聯賽賽場追番失去嘅時間咁話喎,所以喺冬季轉會窗先由侯城轉會到韋斯咸。

辛迪加斯(路透社)

其實獲中國球會垂青但拒絕嘅球員都有唔少,原因不外乎都係想踢頂級足球等。或者用表明唔想同較低層次球員踢波嘅梅頓斯說話總結一下:「我哋聽過有啲球員話去中國係為咗歷險,但冇人會信佢哋。」其實,有幾多球員真係想做「新馬可孛羅」?有幾多個係真心「對中國這個東方國度很嚮往,想體驗新生活」?有幾多個「被球會計劃吸引」而真心賣命?有幾多個「細細個已經鍾意個球會」?係咪錢作怪?有幾多個真心覺得「金錢不是主因」?希望嚟緊有邀約嘅球星,學香港國腳積施利話齋,唔好以為自己Google咗就當了解咗。係呀,有個國家你連用Twitter或Instagram求救都要翻牆先得㗎。

(文章純屬作者意見,不代表香港01立場。)