文：洛迪高@世界波

喺摩納哥公國，有一座建在停車場上嘅球場，看台於法甲比賽日都略顯空曠，但無阻球場主人摩納哥球會上年喺法甲及歐聯連連製造驚喜，亦無阻佢哋出產，製造或塑造唔少球星。曼城早前以5,750萬歐元嘅破後防轉會費世界紀錄價錢簽入摩納哥左閘文迪（Benjamin Mendy），加上中場貝拿度施華（Bernardo Silva）及巴卡約高（Tiemoue Bakayoko）都分別投身曼城及車路士，加上之前轉會曼聯嘅馬迪爾（Anthony Martial），亦令球壇中人驚嘆球會可以喺成績及財政上兩得意，引起筆者對於摩納哥成功之道深感興趣。

俄羅斯富商瘋狂投資後回復理性

當俄羅斯商人雷博洛夫列夫（Dmitry Rybolovlev）喺2012年12月以1蚊歐元購入乙組嘅摩納哥時，好多人都認為佢會成為車路士班主艾巴莫域治（Roman Abramovich）咁投資球會，事實佢為咗幫球會盡快升班及爭標，都曾瘋狂投資過，不過大事投資過後，發現球會入座率唔高（當時平均入座率約得9,000人），又無咩贊助商加上轉播收益唔高，要過財政公平原則都好難，之後球會就開始變成一個公司咁營運，講求經濟效益，諷刺嘅係行呢條路，反而為佢哋帶嚟上年嘅佳績及成就。雖然班主曾經講過，足球呢門生意同普通營商不一樣，但事實上近年球會唔少決定決策，都似足一間新興公司。

出門遇貴人

識人好過識字，相信呢句說話喺商業世界都會得到唔少認同，網絡細唔緊要，如果網絡夠強，一樣夠照！摩納哥喺升上法甲到而家都得到一位貴人幫助，呢位就係葡萄牙經理人文迪斯（Jorge Mendes）！喺升班之初，文迪斯就為只係法甲升班馬嘅球會引入一班球星，包括法卡奧（Radamel Falcao），摩天奴（Joao Moutinho）及占士洛迪古斯（James Rodriguez），令摩納哥實力極速升level，更神嘅係佢為摩納哥先借後買，引入當時只為賓菲加踢過八分鐘葡超嘅貝拿度施華，之後嘅故事就係佢今夏以5,000萬歐元轉投曼城，對比當時轉會費1,575萬歐元高一截；另外占士以4,500萬歐元走入大公國，一年後就以7,500萬歐元投西甲皇家馬德里，可見文迪斯唔只喺成績上幫到摩納哥，直頭幫球會賺埋錢，仲唔係貴人?

低買高賣買購入潛質新股及製半成品後，轉售圖利

低成本購入新星，然後球會培養並圖日後以高價賣去其他大球會，就好似一啲公司利用其他工廠產品貼上自己品牌然後賣出更高價錢，當然摩納哥付出嘅心神會更多。

兩年前喺轉會窗最後階段壓哨以6,000萬歐元加盟曼聯轟動全球嘅馬迪爾，摩納哥於13年僅用500萬歐元就從里昂購入；當球會賣出占士後，就悄悄地以400萬歐元購入卡昂翼鋒林馬（Thomas Lemar），例子仲有已轉投馬德里體育會嘅比利時中場卡拉斯高（Yannick Carrasco，免費由亨克青訓挖至摩納哥青訓，及後以1,726萬賣予馬體會），剛以4,000萬歐元上車嘅中場巴卡約高就出自法甲球會雷恩青訓，以及14年以1,300萬歐元轉投摩納哥，一年後以2,200萬賣了華倫西亞嘅突尼西亞中堅艾迪諾爾（Aymen Abdennour）等人。購買有潛力球員加工，此舉不但能夠以較低投入搏取更大回報，而且喺球員心目中球會亦成為升上豪門嘅踏腳石，令更多年青才俊願意投效並樂意表現自己，因此可在短期內幫助摩納哥提升成績，而且喺經濟上都可以幫助摩納哥達到「貿易順差」，就好似《Football Manager》妖人泰利文斯（Youri Tielemans），就喺今個夏天選擇加盟摩納哥，並表示自己呢個選擇就係希望藉摩納哥作升level平台，踢得好再諗轉會豪門，相信摩納哥同樣期待佢能夠喺球場內外都對球會有助益，情況就好似當初以1,500萬歐元由西維爾購入年青中場干度比亞（Geoffrey Kondogbia），只係踢咗兩季，幫助球會喺14／15年歐聯踢阿仙奴出局後就以3,600萬歐元轉投意甲（褪色）勁旅國際米蘭。

發展青訓配合球會戰略及可持續發展

長期靠外來助力，萬一有咩意外公司（球會）隨時萬劫，所以為咗可持續發展，都要充實自己本身實力。放喺摩納哥上面，大家可能記得佢哋買過啲咩人，但就未必知道球會其實每年會用上800萬歐元投入青訓系統。成品有邊個，首先就係上季表現驚豔，今夏轉會市場炙手可熱，喺市場身價隨時賣到過億歐元嘅基利安麥巴比（Kylian Mbappe，據權威網站transfermarkt表示，佢市場價值達2.5億歐元），就係由摩納哥青訓出身，而已轉會至巴黎聖日耳門嘅法國左閘古沙華（Layvin Kurzawa）都係由球會B隊出身。為咗能夠能更快培養選手，球會有一個特別措施：就係會將表現出色嘅球員放到年紀比佢哋本人大一歲嘅組別嚟加速佢哋成長。另外球會亦因應策略發展球探網絡，佢哋淨係喺巴黎已配置6位球探領先其他球會，無論係踢緊草根業餘足球隊定職業球會梯隊，無論係喺巴黎市踢波定係市郊踢波，只要有才能，摩納哥都可以搵到，頭先提到嘅基利安麥巴比於14歲就畀摩納哥相中並簽下，佢出生地點係邊？就係巴黎附近嘅邦迪。球會喺外地都有球探去搜索年青才俊，最近一位就係上年1月由阿積士簽下嘅比利時中場安托奴奇（Franco Antonucci，17歲加盟球會）。球會更購入比利時次級聯賽球會色格拉布魯日，為年青球員有更多實戰經驗。

搵啱掌舵人

有足夠資源都未夠，如果唔識好好利用都係徒然，摩納哥搵到查甸（Leonardo Jardim）就真係搵啱人。由14年接掌球會嘅佢中意用年青球員而且亦善於培養佢哋。另外佢哋嘅體育經理甘波斯（Luis Campos，已離任）及哥頓（Antonio Cordon，即將離任）都有一定功勞，佢哋在任時利用佢哋人際網絡幫助球會。

其實相似發展模式有唔少球會都試過，但係要真正做到持續發展就相當困難。尤其當有更多人研究到球會「玩法」後，就會為球會接落嚟嘅策略做成一定阻力，而且摩納哥雖然奪得聯賽冠軍，但始終都係被視為巴黎挑戰者，而且球會吸引力似乎仲未好夠，唯有持續有好成績先可以真正吸納球迷（起碼提高入座率先…），就可以賦予球會更大嘅戰略彈性，而唔會只變成對年青球員及買賣手段嘅賭博。咁樣先可以成為一間可一直向成功邁進嘅公司（球會）。

（本文純屬作者意見，不代表香港01立場。）