【讀LingU你要知】住Hall實有位　見貓多過見人？

嶺南大學身為大西北唯一一間大學，被稱為最偏僻的大學，亦是不少人眼中的「水泡」。嶺南大學自搬到屯門後，經常有網民問「係咪要騎牛返學」，究竟讀嶺南是否日日都見到牛？你對嶺南大學又有幾深認識？

嶺南大學學生習慣把宿舍按地理位置分為「南宿」、「北宿」、「新宿」三大部分。（嶺南大學圖片）

過期大學生
曾經的大學生，80後老鬼，身老心不老，自問玩盡大學3年，勁爆回憶同美好經歷，足以講足30年。

1.Year 1一定要住Hall？

嶺大為全港唯一一間為本科生提供四年全宿的大學，本科生在Year 1時必須要有一個sem住Hall。無論你家在邊區，距離嶺大有多近，一律要住Hall。當然，如果你理由夠充分，可以向學校申請不住宿舍。

傳說經過「不過三亭」的話，GPA便不會過三。（網上圖片）

2. 不過三亭

原名余近卿紀念亭，位於廣場右側，人跡罕至，傳說經過此亭的話，GPA過不了3，自命勇者的你可以一試。

義塚位於校園後山，旁邊有「永別亭」。此處被大閘圍封，如要拜祭需到大學保安室登記。（網上圖片）

3. 與墳墓同在

嶺大周圍有零星的山墳墓地，而於黃玉蘭樓側更有一個麒麟圍義塚。義塚附近有一涼亭，名為「永別亭」，相傳當年工人會在亭中暫放身份未明的屍體，故此「永別亭」陰氣極重，歷年來傳出唔少鬼故，未聽過真係枉為嶺南人。

4. 偏僻之最？

元朗、天水圍、屯門等西北地區自今仍然被誤解要騎牛入去...其實時至今日大西北已經發展得好完善，嶺大距離西鐵站只需要十分鐘路程，就算你半夜返Hall(或者出去老蘭飲嘢)都有通宵小巴直到嶺大門口，比起某些大學已經好方便。

嶺南大學附近的屋邨有不少宵夜檔，不少學生前來「醫肚」。（網上圖片）

5. 宵夜多選擇

大學生少不免要趕Paper，做莊務，做到凌晨一兩點餓起上來真喺好難捱，不過夜媽媽Canteen已關，可以去邊度搵嘢食？嶺大呢方面真係完勝其他大學，事關嶺大旁邊有一個屋邨，行兩步就有熱辣辣宵夜，價錢合理又多選擇，好過叫等成個鐘先到嘅麥麥送。

嶺大校園內經常有貓「攔路」，學生們已見慣不怪。（嶺南貓關注組圖片）

6. 嶺南貓

嶺大校園內有超過40隻社區貓，呢幾十隻貓喺嶺南人心目中有一定嘅地位，更有同學為照顧佢哋而成立咗「嶺南貓關注組」，貓義工們會定期餵貓，仲會進行領養活動。如果你係愛貓之人，嶺大簡直係天堂！

你都想成為開筆一份子，稿件可電郵至opener@hk01.com；文章純屬作者意見，不代表開罐立場。