除咗打工，我呢幾年一直有做小生意、小買賣，成日都會遇到「有個性」的客人。而年尾年頭消費旺季，客人多，嚇人的事當然更多，如果你都係做服務業，相信你隨口都講得出十個嚇人客事，如果你係客而且深信「顧客永遠是對的」，我祝你新年進步，希望你狗年可以與時並進、放低舊有思想重新做人。

想得到24小時回覆，請問是否願意24小時付款？

呢個年代大家對網購都唔會陌生，24小時購物成為習慣，24小時查詢被看成必然，有時夜晚11、12點收到訊息，就算未瞓，我都寧願享受吓私人時間，不讀不回，打算第二日先覆，點知每十分鐘就會收到客人追問，好多時係「OK???」、「???」、「見字請回」之類，試過有朝8點搭緊車返工，一邊搭車一邊覆返前一晚嘅客人，比我見到有一位客人零晨兩點開始一直Send問號過嚟，Send到朝早7點幾……其實佢只係想買一個家居擺設，望住一堆「???」的訊息，真係無奈之餘又覺得幾搞笑，如果我零晨覆完佢，佢又係咪會零晨過數付款比我？

做得生意當然歡迎客人查詢，越多查詢越開心添，亦唔介意客人半夜三更Send訊息問嘢，但Common Sense應該知道人係要休息的，半夜無人覆係非常正常嘅事，客人請保持冷靜，乖乖去瞓，瞓醒就有答案。

多謝欣賞，但「讚」不能開飯，請付款

除咗24小時服務被視為正常，講價／R著數／R贊助亦唔知點解會被顧客解讀成「益咗你」。我知呢個年代Like & Share係好重要，但點解有啲客人會認為Like & Share重要到可以代替金錢去付款？有位朋友是攝影師，他收得最多的「益你」訊息就係：

我地有三十個小朋友一齊搞生日會，你免費幫我地影相，我地三十個家庭會幫你Like & Share個專頁，OK？

咁都仲要問？當然唔OK！難道攝影師可以同業主講：

我比三十個Like & Share你，你今個月免我租OK？

又或者入餐廳講：

你提供我一日三餐，我用三十個Like & Share同你換OK？

其實細細個，我地就已經知道世上無不勞而獲，想要一個玩具、一件衫，就只能用錢買，想買更多嘢，方法就係搵更多錢，虛擬的Like & Share，係畀你用嚟表達欣賞、支持或惹起關注的，並不能用以取代貨幣，你估你嗰三十個係比特幣（Bitcoin）咩？

售後服務有底線

有客人幫襯我買咗部遙控飛機，佢係喺舖頭內開哂盒檢查清楚先買走的，亦即係話客人同意商品無穿無爛。點知當晚佢就Send訊息去專頁，話叉唔到電想換條新的叉電線，叉電的確係要返到屋企先知Work唔Work，所以我同意比佢換。第二日，佢成部機拎落嚟話唔識用，雖然盒內有說明書，不過人都喺面前了，就教埋佢玩啦，甚至成部機砌哂飛一次，確保零件齊全、所有線路同電都運作良好，客人滿意地離開。

隨後嗰兩星期，客人都不斷Send訊息問架機係點樣用、點樣開…….我亦不厭其煩一一解答。點知兩星期後，客人無再私下Send訊息，而變成公開喺專頁留言，話架遙控飛機飛唔到，而且條叉電線係爛的，話我賣爛嘢比佢，要求換新。喂大佬，唔好諗住公開講就係真相先得架，呢啲人平時係咪比同事屈得多，覺得屈屈吓就咩都換到返嚟？

個客話要，咁究竟比定唔定？

所謂「顧客永遠是對的」，是需要建基於某些條件的，首先顧客要係一個誠實嘅人，提出嘅要求係有真正需要而唔係純粹「唔想執輸」；第二係該要求不影響店舖正常營運。而2002年劉德華一句「今時今日咁嘅服務態度係唔夠架」，已經令好多服務業人員忍辱負重多年，可以自己話事的小舖，最佳應對方法當然係企硬拒絕無理要求，而大企業又能唔能夠擇善固執，選擇相信自己的員工而唔好吓吓都息事寧人縱壞啲立心不良嘅客人？

（本文純屬作者意見，不代表香港01立場。）