【誇世代】馬海倫演技爆發零提名 網友不值：不能選她做女主角？
撰文：洪曉璇
出版：更新：
馬海倫得知尚家被陳豪所害時，變臉對質兼發毒誓，呢場戲相當精彩。(影片截圖)
長達50集嘅台慶劇《誇世代》，星期五終於大結局啦。呢套戲一開始宣傳時就以五生五旦，加埋無限咁多個TVB藝員做串星作賣點，台慶橫掃多個提名。不過有網友最近就喺討論區提出，今年台慶提名名單，除咗啤啤劉佩玥，仲有一個更大嘅遺珠，就係《誇世代》中嘅尚慶端，即係資深演員馬海倫，仲話：「為甚麼不能選馬海倫做最佳女主角？」大批網友留言力撐。
喺幾個討論區都出現力撐馬海倫嘅post。(網上截圖)
+1
馬海倫其實一向係公認嘅實力派演員，喺《誇世代》中飾演尚家女主人，生咗李佳芯、龔嘉欣、江美儀等七個女，雖然又係做人媽媽，加上戲中有大批一線演員，馬海倫本來都係一貫綠葉位置襯托主角。不過好嘅演員大家一定會注意到嘅，有網友就話尚慶端喺戲中佔有相當重要份量，接近7成集數都見到佢嘅身影。而且戲中無論發火定係喊戲都收放自如，演技實在係爐火純青。
當馬海倫被告知今次頒獎禮沒有得到任何提名，她都不敢相信直言︰「完全沒有提名？」她又好多謝網友支持話：「非常多謝各位,希望今年馬來西亞or星加坡拿喜愛角色or女配角，香港冇在外地可以。」。她又提提大家今晚一定要睇今晚的《誇世代》，指昨日那場戲「零NG」，拍攝一氣呵成：「看埋今晚 昨晚未完那場，我沒有尾後NG片,因為我好少NG，我又唔使拿劇本入廠，全部熟讀！」大家真係要支持海倫姐啦！
馬海倫同戲中一班演員相處得非常融洽。(馬海倫微博)
當年嘅馬海倫真係好省鏡架。(網上圖片)
現年70歲嘅馬海倫，入行已經超過50年，1966年加入邵氏訓練班，廿歲出頭已經獨當一面，同期女星有徐楓及鄭佩佩，馬海倫於1973年拍完著名武俠片導演胡金銓執導嘅《迎春閣之風波》，就選擇結婚退出幕前專心相夫教子。直到1984年先再復出，復出作係許鞍華執導嘅《傾城之戀》，1992年同周星馳合作《鹿鼎記Ⅱ神龍教》飾演神尼。90年代加入TVB，《天涯歌女》、《真情》及《皆大歡喜》等劇集中演出都令人印象深刻。而佢亦喺2013年萬千星輝頒獎典禮奪得傑出演員大獎。
加入TVB後第一年，馬海倫有份拍攝當時非常受歡迎嘅《天涯歌女》。(馬海倫微博)
《鹿鼎記Ⅱ神龍教》入面，神尼一角堪稱經典。(影片截圖)
2013年萬千星輝頒獎典禮中，馬海倫奪得傑出演員大獎。(影片截圖)