【金像獎2018．茶水蓮姐】客串《算死草》︰一見鏡頭就腳震
撰文：許育民
出版：更新：
第37屆香港電影金像獎專業精神獎得主︰茶水蓮姐楊容蓮（Pauline），入行30年，一直緊守幕後，向台前幕後提供熱飲凍茶。
不過香港電影製作向來鍾意即興，不少導演見蓮姐怕怕醜醜，就專登搵佢客串一角半色，以營造一份獨特的喜感。30年來，蓮姐參與過的幕前演出就有《古惑仔》1、3集、《算死草》、《玻璃樽》等，套套大製作，部部過千萬呀！
蓮姐在《算死草》（1997）飾演證人，做假證供憶述被葛民輝用三截棍襲擊的情況。一句︰「係咁扑、係咁扑」無限Loop。（影片截圖）
《古惑仔》第一集，阿叔演的牧師在電梯首次遇上山雞，同場的街坊就有蓮姐，飾演信徒。（影片截圖）
蓮姐︰「多謝劉偉強，訓練到我唔怕鏡頭。」
根據網民整合的資料，蓮姐大大話話演出過33部作品，要數最難忘的演出，蓮姐好快就答係《古惑仔》同《玻璃樽》。「我要多謝導演劉偉強，之前未拍過戲，埋位一見鏡頭就腳震，多得佢俾機會我不停演，而家見到鏡頭都唔驚。」由於蓮姐本身在行內已經有名，導演們見她原來咁演得，於是紛紛邀請她客串。《衝鋒隊怒火街頭》（1996）、《烈火戰車2極速傳說》（1999），還有最多影迷記得的《算死草》，一句︰「係咁扑、係咁扑、係咁扑……」好洗腦。
【茶水蓮姐．訪問一】唔信自己會得獎︰其實我沖咖啡唔好飲！【金像獎2018】茶水阿姐楊容蓮獲專業精神獎 阿Sa︰冇佢開唔到工
蓮姐初見鏡頭，坦言驚到腳震，多得劉偉強密集訓練。（影片截圖）
成日話港產片製作求其，但留意番，蓮姐在第一集飾演牧師的街坊信徒，去到第三集《隻手遮天》就繼續演街坊（圖左），好連戲。（影片截圖）
「如果部戲收得，我會特別開心」
不過問到蓮姐最難忘的演出，她首選《玻璃樽》（1999）「我覺得好好笑呀，導演（谷德昭）好用心教我，個角色又開心，而家有時諗番起都即刻想笑。」
身為電影界一份子，雖然不是參與幕前演出，但總算為整部電影出過好幾分力。如果參與的電影收得或唔收得，叫好或唔叫好，蓮姐又會有咩切身感受呢？「如果參與的電影收得，當然會特別開心，就算唔收得，我都唔會唔開心，因為片場上個個都對我好好，拍攝過程已經有好多笑容。」可以感受到，蓮姐的工作環境真係充滿歡樂，笑聲笑聲滿載溫馨，好有愛呀！
蓮姐有客串過鄭中基主演的賀歲片《心想事成》（2007），在巴士上賣點心。（影片截圖）
在《後備甜心》（2005），蓮姐飾演超市清潔阿姐。(影片截圖)