古巨基演唱會跌落窿背脊落地　摸住頸安慰觀眾：我想繼續落去

古巨基（Leo）呢幾晚都喺紅館度為自己嘅《古巨基WE我們世界巡迴演唱會香港站特別版》演出，昨晚首場就演出得好順利，而且反應仲好好添。不過，基仔今晚嘅演出就發生咗意外，佢唱完兩首歌後，就向後跌咗落台上，有現場觀眾就話基仔應該跌得幾傷下，而基仔都幾分鐘後亦企返起身上台繼續唱，之後佢摸住頸同一班觀眾講咗番說話：「我想繼續落去，係我自己唔小心，係我唔記得咗時光機個位，冇問題，多謝你哋願意喺度等返我上嚟，我好想繼續落去、我盡力繼續落去，唔好嚇親大家，冇事嘅，行到。」佢亦都話想休息一陣，但冇特別休息到就繼續唱，之後佢亦都係台上話自己係背脊落地：「不過一陣如果換衫位耐啲，跳舞梗啲，大家體諒下。」據知，完騷後基仔會到醫院檢查傷勢，而今晚到場睇騷嘅嘉賓就有：余安安、蔡卓妍、陳慧嫻、趙薇、吳浩康、杜徳偉夫婦、容祖兒、阮兆祥、陳豪陳茵媺夫婦、張頴康夫婦同趙增熹。