又到聖誕，可能唔少男仔都想趕尾班車，等自己唔使毒自過節。一心急通常就出事，唔覺意太Chur個女仔多數都冇好下場。下面15個由眾女小編總結嘅溝女禁忌，睇下自己有冇踩到地雷喇！
【1. 識咗冇耐就叫佢BB、豬仔】 識咗幾日就咁親暱，真係心諗依家同你好熟？！唔好話普通朋友，就算係畀曖昧中嘅男仔咁樣叫法都覺得太over。（《等一個人咖啡》劇照） 【2. 一日到黑都係度問佢做緊乜】 好想同個女仔傾計，但又冇話題，惟有係咁問佢做緊乜。其實如果有嘢想share自然會搵你，點解成日要向你報告行蹤？（《奶酩陷阱》劇照） 【3. 過度噓寒問暖】 「今日開始轉涼，記得著多件衫呀。」、「記得瞓多啲～」如果男朋友對我做呢啲真係幾sweet，但仲係普通朋友講呢啲……似係好想跳入下一個階段，做多咗喇。（《奶酩陷阱》劇照） 【4. 仲喺發展階段就要確立身份】 同你食下飯、睇下戲只不過係互相了解嘅階段，識咗唔係好耐就失驚無神問：「其實你當我係乜。」咪當你係普通朋友囉，你expect我答你啲乜？ （《三流之路》劇照） 【5. 過多身體接觸】 普通傾偈都要挨身挨勢，見咗一兩次就掂手仔、搭膊頭，只會覺得你好猴禽，本身對你幾好印象都即刻扣哂分。以為靚仔做就冇事？Sorry，醒目女一眼就睇得出你係”fxxk boy”。（《河伯的新娘》截圖） 【6. 認屎認屁】 雖然叻嘅男仔真係特別有吸引力，不過謙虛緊要啲囉。一輪嘴咁講自己啲achievement、識邊個邊個，唔好意思，冇人想知呀。真係想知就會主動問你喇！最難頂係唔識又要扮識，畀人問多兩句就露哂餡。（《藍色大海的傳說》劇照） 【7.睇唔起女生玩意】 譬如，有女仔同你行街，話想睇下商場嘅卡通人物擺設，就算你真係唔好呢味嘢，試下唔好一句得埋去：「下，有乜咁好睇呀。」唔係要你都中意埋一份，但唔好睇唔起人哋嘅興趣OK？（《舉重妖精金福珠》劇照） 【8. 同女仔講「我最近中意咗個女仔」】 最尷尬係要個女仔估邊個。數完共同圈子嘅女仔你實話唔係，但又唔想比位你表白喎，除咗「哈哈，係咩」都唔知畀咩反應好。（《藍色大海的傳說》劇照） 【9. 突然男友上身管住哂】 「唔准咁夜瞓！」、「你張相入面啲男仔邊個嚟？」可能男仔覺得女仔會鍾意呢type「霸道總裁」，大佬你係邊個？未一齊已經咁煩，一齊咗之後咪仲癲？（《金秘書為何那樣》劇照） 【10. 喺對象面前講佢男性朋友嘅壞話】 「你同學一定係狗公」、「返學使唔使gel頭呀」，唔好意思，話唔定人地識佢仲耐過你。你唔係以為喺對象面前破壞佢哋形象，自己機會會多啲？（網上圖片） 【11. 突然喺返學/返工地點出現】 可能有男仔覺得咁樣係畀驚喜個女仔，不過當仲未好曖昧嘅時候做呢啲嘢只會係「驚嚇」，唔係驚喜。（《河伯的新娘》劇照） 【12. Like哂對象ig/fb 啲相】 想Like相咪Like最新嗰張囉，點解要碌到最底連中學po嘅相都要Like？呢種引人注意嘅手法好令人不安。（《藍色大海的傳說》劇照） 【13. 一出post就即刻留言】 如果次次出post都秒回真係好恐怖，成個跟蹤狂咁，好似每秒都碌緊女仔個fb/ig咁。但女仔唔會覺得你咁樣叫關心佢，剩係覺得你好變態。（《微微一笑很傾城》劇照） 【14. 成日喺social media叫春】 日日話自己好lonely，今個聖誕冇人約，驚死人唔知你渴望愛情，就好似你成個世界得返「出pool」呢件事，成個怨婦咁。（《藍色大海的傳說》劇照） 【15. 定時定候報告自己行蹤】 冇人想知呀，過主喇。大家可能只係「友達以上，戀人未滿」嘅關係，你唔使當個女仔係女朋友咁對待。（《奶酪陷阱》劇照） 
