雖然題目係《武術與哲學》其實會講埋其他人文學科嘅書點解我識？唔通我成日睇書又話你知咩

每次講起武術與哲學，大家都提李小龍。當然係因為有個好直接嘅原因：李小龍好打又多人識，同時佢又讀哲學出身。當然佢寫嘅嘢有哲學味，亦對武術有深刻嘅反思，不過，大家唔應該去到呢步就停，武術同哲學之間都有好多嘢可以講。究竟仲有咩哲學書（可以）同武術有關呢？

出拳 — 關於身體協調的哲學

講起身體就不能不提梅洛龐蒂（Maurice Merleau-Ponty）本《知覺現象學》（Phenomenology of Perception）。

其實，關於身體嘅哲學書唔係大家想象咁多。哲學入面，一直都對身體唔太重視。尤其係由笛卡兒開始，對身體嘅討論就愈嚟愈少。直到現象學家梅洛龐蒂將身體再次帶到聚光燈之下。

佢嘅文章好多好長，而且對佢嘅解讀都有好多（哲學嘛），所以我唔喺到講太多，講下佢講嘅一個重要概念 — 身體圖式。

按劉國英教授喺《梅洛龐蒂的肉身主體現象學及其哲學意涵》入面解釋，身體圖式論嘅意思係「肉身主體是一種能將多種感覺器官統一，並且和諧地協同運用的能力，而這能力同時是一種不需要提升到反思的高度、即在前反思的階段或狀態下的知識」。

簡單講，就係日常生活中嘅不同簡單動作，都係由不同身體部份共同協調嘅結果，而且我地唔需要做每個動作之前都諗一次個動作點做。

例如，出直拳嗰時，並唔係單純運用手嘅肌肉。力量嘅運送係由腳開始，需要腳指、腳腕、小腿、大腿、胯、腰、背、肩膀、上臂、前臂嘅共同配合，先可以打出一拳有力嘅直拳。喺學習初期，可能要一步步思考每個身體部份，先至出到一拳好嘅。但當你打夠一千拳，你就唔洗再諗住隻腳點推，條腰點轉，就可以出到一拳靚嘅直拳。反而，如果你呢個時候出拳，再一個個部位去留意、去諗，你會打唔返一拳好嘅直拳。以上嘅理論唔會令你好打咗，不過知多少少，可以用嚟結識男仔／女仔嘛。

加多句，唔好買佢本中文翻譯本，譯到一舊舊。

點解打沙包嗰時好順，對打就唔順？

呢個問題，同日本哲學家西田幾多郎關於「行為的直觀」入面「節奏與處境」嘅討論有關。

西田喺關於身體嘅學說入面 ，想搵出人的動作既非機械主義 ，又非神秘主義嘅第三條路。

一位拳擊手打沙包嗰時 ，出拳非常流暢。但喺同一個場地中 ，打嘅唔係沙包 ，而是對打練習嘅對手 ，出拳可能就唔會咁流暢。明明係同一個環境 ，但因為處境唔同 ，亦會有可能影響到動作節奏或自身，影響兩者的和諧。

西田無用處境一詞，而係用「足場」，亦即立足之處，但足場其實同處境概念相近。處境唔同，令人自身節奏亦有改變，一D平常嘅動作亦唔能夠運用自如。一個人永遠處於某個處境之下，而處境會影響心理同生理。喺對打訓練當中，緊張和恐懼會令人肌肉礓硬，動作亦會變得唔協調。而機械無論咩時候，面對任何處境都唔會改變動作。

當然，呢類嘢唔係得佢一個人講。社會學入面符號互動論（Symbolic Interactionism）、常人方法學（Ethnomethodology）都有提及。

有無好睇少少、易入口少少嘅書？

有一本叫《Fighting Scholars》嘅書，大家可以留意下。（周星馳套《唐伯虎點秋香》英文名叫Flirting Scholar，唔好睇錯）

呢本書係社會學／人類學書嚟，無咁抽象，實在好多。如果要講本書我可以講成日，所以我都係簡介下比大家知入面講咩算。首先本書係論文集，計埋開頭結尾，有14篇文章。入面有以詠春同太極為例講慣習（habitus）、卡波耶拉（Capoeira、巴西戰舞）對於身心嘅教化、用巴西柔術講梅洛龐蒂同「身體自動波」、仲有講泰拳同「本真性」（authenticity）。

除咗呢類比較硬嘅論文，都有較軟性嘅。例如練習時男仔打唔打女仔、美國黑人嘅52手（Fifty-two hand blocks，大家比較少聽，係個喺特別文化環境下出現嘅武術，搵日講）、日本弓道與宗教，呢類關於性別、種族同宗教嘅討論。

聽到都開心，係咪呢？

講真，武術喺人類文明入面有一個好獨特嘅位置。當然，武術係一種保護自己嘅技術，亦係搏擊技術；同時又可以提升到精神層面，作為一種文化載體存在（或者武術本身就係文化一部份）。但係，講武術嘅社會學／人類學書，相對其他例如講舞蹈、藝術嘅書，又真係比較少。大家如果搵到其他，記得話我知！

其實仲有好多書想介紹比大家。例如單講武術理論嘅書，以及更接近文化層面嘅書，搵機會再同大家講。最後俾大家睇睇本書個樣，不過個封面認真麻麻，見到都唔開胃……

望到封面唔好話買，攞都唔想攞起。今日係咁多！

（本文純屬作者意見，不代表香港01立場。）