中年好聲音3｜任永健被淘汰　遺憾冇陪歲半兒成長：好似唔識我咁

《中年好聲音3》昨晚（06/4）一集，阮慧珊和任永健成為了第13和第14名，遭到淘汰。節目尾聲，任永健說出了一番令人感動的說話。

任永健說：「嗰陣時冇諗過自己可以上電視，呢個係我第一次上電視，個感覺好夢幻，冇諗過自己可以做到，喺咁多人面前喺大氣電波面前唱歌。其實係小朋友嘅力量，令到我有呢個勇氣參加比賽。因為我想同佢證明一啲嘢：『努力做就得㗎啦，你睇吓爸爸。』」

任永健「離場」，說出心裡話，十分令人感動。（《中年好聲音3》截圖）

他續說：「我能夠留喺呢個舞台有好多因素，可能係好彩，可能係你嗰日嘅表現狀態好，但係你唔知幾時就會忙，所以我好珍惜呢個舞台同機會。但係一諗到呢度，我就諗起我個小朋友。」他哽咽道：「8個月啦，我個小朋友歲半，大個咗好多。我有時都喺度諗，我係咪好自私做自己想做嘅嘢，忽略咗我屋企。我見到我小朋友歲半，但係有一半嘅時間我冇乜點陪過佢，佢好似唔識我咁樣。」

他自問：「我係咪要繼續堅持㗎？再堅持得唔得㗎？我小朋友會唔會唔記得我？但係撐到呢度，我覺得對所有人都有交代。」