【每逢大事講故事】老娘就是要放狠招 睇文翠珊如何華麗U-Turn
雖然好老土，但都忍唔住講句：女人真係好善變。講嘅係英國首相文翠珊（介紹番，內地嘅同胞幫佢起了個聽起來甜中帶酸的名字：特雷莎‧梅），佢上星期三突然係英國政壇投下重量級炸彈：宣布提早大選!佢自去年脫歐公投之後，已經講過至少7次話「在2020年之前不會有大選」，成功呃哂所有人，包括在野黨。而原來U-Turn May並唔係浪得虛名，佢就係憑呢個技巧上位做到新鐵娘子，「家下着黃色衫，又變咗着綠色衫」嘅功能真係唔可以睇小。
剛年屆花甲嘅May姐，呢招真係狠。英國要籌備一場大選，通常最少都要花幾個月時間。不過，由May姐宣布、國會通過到6月8日舉行大選 ，前後只有8星期。難怪其他黨派包括工黨及自由民主黨，聽到消息後個樣會咁……
宣布提早大選後，雖然要過國會，但下議院大部分議席都係May姐嘅人，好難出現變數。至於在野黨，即使擺吓姿態點都好，都要出嚟講兩句批評May姐自私呀搞政治呀咁，估唔到工黨黨魁郝爾彬差不多係第一個跳出來話舉腳贊成。
正常人嘅反應，起碼要好似下面個婆婆咁啦：
「吓，又嚟過呀？﹗我頂唔順喇。」
「點解佢要咁做呀？」
事實上，舊年先有脫歐公投，跟手首相都換埋，依家提早大選又要投票，真係聽到都覺攰。順帶一提，婆婆對於再次要投票嘅真摰反應，大家都好Like，亦都反映好多人心聲，片段係網上瘋傳，瞬即做咗網紅。
面對突如其來的大選，工黨班議員除咗學地盤叔叔試著說：「也許我可以加班把事情做完」同埋「我會試著把這件事情插進工作進度中」外，相信最想做嘅就係趁機整走郝爾彬。工黨積弱，一直被指政治取態「太左膠」嘅郝爾彬一早被指舵衰家被黨友唾棄，今次May姐放狠招要收工黨檔，郝爾彬天真地贊成，爭在無攞兩個啦啦球係手。
大選正常都要印單張呀、海報咁，依家黨友連科爾賓個樣都唔想出，仲話「你唔好同我提起佢個名」（don’t mention the C-word）。陰公豬嘅郝爾彬係黨友眼中已經做咗佛地魔。更令人慘不忍睹，係郝爾彬的左右手根本無人識搞競選活動，一盤散沙是工黨的寫照，「唔係時間問題，而係根本我地就唔係坐在同一條船」一名資深黨員咁講。呢個仲唔係May姐最想見到的畫面？
May姐呢招叫「趁佢病攞佢命」。事前是咪一點蛛絲馬跡都冇？都唔係嘅，同樣畀佢嚇窒嘅英國媒體，最近諗返，都覺得有古怪。
【深度專頁】談判路漫長 首相文翠珊提前大選 勢一箭雙鵰挫工黨
好似白宮有「滾蛋節」（Easter egg roll）一樣，英國唐寧街十號都會係復活節前搞一場類似「捕獲野生復活蛋」嘅活動。英國政治版嘅記者都會獲邀，帶埋小朋友一齊到首相府嘅大草地上，尋找大大小小的朱古力復活蛋。
細嘅當然玩得開心，至於部分心水清嘅記者就問：「蛋就多喇，不過首相去哪兒？」官員惟有打官腔，話首相有其他嘢做，遺憾地未能參與其中。
唔單止咁，本來要提上國會議程討論嘅事項都不見了，真係耐人尋味。
May姐係呢段時間，原來去咗威爾斯行山洗滌心靈。有內情人透露，關於提早大選，其實文翠珊已經諗咗一段時間，不過仍然未能下決定，直到係四月初同老公去威爾斯度假行山一星期，邊行山邊同佢嘅私人顧問兼老公討論提早大選的好壞，最後決定依家正時提早大選的好時刻。不過，其實係佢度假之前幾日，即3月30日，May姐透過發言人再一次話「將不會（提早）有大選，不會發生的」，時隔大半個月，卻向全世界公布提早大選，今日的我打倒昨日的我。
鞋，全部都係鞋
坐上首相寶座前，相信無乜人留意佢，除咗佢啲豹紋鞋。
貴為英國第二位女首相，May姐與「鐵娘子」戴卓爾夫人同在牛津畢業，人怕出名豬怕肥，她兩名大學同學分別向傳媒爆料，指她早在大學生年代已立志「我要做英國第一位女首相」！你無睇錯，1974年入牛津，1977年畢業，佢講呢番說話嘅時候，英國的確仍然未有女首相，可惜出世遲了廿年，1979年被戴卓爾夫人「截糊」，sosad。Timing呢味嘢永遠令人無可奈何，拍過拖嘅你應該都會明，除非唔明。
文翠珊今次已經唔係第一次華麗U-Turn，佢由一個平平無奇、寂寂無名嘅普通精英，突然大茄變主角，化身一國領袖，除咗係好似大部分古裝劇主角一樣，等，然後等了又等，等到花兒也謝了的時候終。於。機。會。嚟。喇。飛。雲。把握機會反轉豬肚，然後U-Turn轉身射個三家姐，一舖翻身。
細細個已經參與保守黨地區組織活動嘅May姐，1992年參選國會議員，真係輸咗好幾云，到1997年終於勝選，她已經41歲。這自是政治人物黃金年齡，然而當時保守黨內有兩位來自伊頓公學、風采逼人的政治新星：約翰遜同卡梅倫，一個細佢8年，另一個細佢10年，兩人都是未來首相的材料，鋒芒將作風平實嘅May姐完全掩蓋，就算幾打得都無用武之地。
佢國會議員張凳都未坐暖，雙子星先後榮升國會議員之列，2002年她成為保守黨歷來首位女主席，終於爭到個第一返嚟，令她信心大增。就係這個時候，原本衣著品味貼近傳統女強人、天天黑沉沉行政套裝的她，突然U-Turn換上色彩繽紛衣著，形象百變，鞋子日日新款，似有意為相位鋪路，常常帶工作返屋企OT盡顯勤奮一面，可惜著到成隻雀咁嘅策略仍然無助仕途。
那邊廂，年輕有為的卡梅倫上位快過火箭，成為接近200年來英國最年輕首相。佢好識做咁比咗個第三把交椅嘅內政大臣位比資深過佢嘅May姐坐。不過內政大臣往往是「三煞位」，好難做得長，素有「政治墳墓」稱號，但她韌力驚人做足6年幾都無事無幹，成為英國百多年來任期最長內政大臣。
而被踢出權力核心的約翰遜做咗倫敦市長之後，成績亮麗，是時候找機會回朝上演一齣王子復仇記。去年佢終於搵到大好機會，以為自己勝券在握的卡梅倫，為選舉承諾「找數」啟動脫歐（Brexit）公投，一路同佢講支持「留歐」的約翰遜，轉個頭就做二五變身Brexit大將，博Brexit成功就可以反底當首相。呢個時候May姐做緊乜？
Suppose周圍幫手sell留歐，但佢只係hea住做，公開場合少有為留歐護航，私底下被卡梅倫和內閣同事叫佢做「潛水艇May」（Submarine May）。佢咁做，明顯係唔想被政府嘅留歐立場捆綁，力保政治籌碼。
隨脫歐派勢頭愈來愈旺，約翰遜以為終於可以踢走阻手阻腳嘅師弟卡梅倫，坐上首相寶座，不再是少年嘅佢還是太年輕了。正所謂現眼報來得快，今次輪到他身邊嘅Brexit最佳拍檔、司法大臣高文浩（Michael Gove）出賣佢，公投由脫歐一方勝出，高文浩快佢一步宣布角逐首相。查實呢啲都係小事，小道消息指，一眾卡梅倫親衛隊不值約翰遜所作所為，威脅要「爆大鑊」，將手頭上有關佢嘅醜聞揚晒出嚟，唔知係咪真係身有屎，諗過度過之後，有醜聞前科嘅約翰遜死死地氣宣布放棄角逐相位。
卡梅倫、約翰遜鷸蚌相爭鬥餐死，二五仔高文浩形象分輸晒，成班男人攬炒嘅結果咪就係益咗May姐上位囉！就係咁，實力派嘅佢冷手執個熱煎堆，終於一圓首相夢……哇哈哈
以為May姐上位經過夠晒離奇？佢嘅攻心計更加神奇。卡梅倫墮馬後，眼下最有實力的對手只剩下約翰遜一個。沒學前任將他投閒置散，她將他放在第四把交椅的外相一職。眾所周知，「大口仔」約翰遜平時開口夾着脷，得罪人多稱呼人少，要佢做外相四周圍同人講嘢，似等佢出醜多過真係做嘢，而且呢個位一年隨時飛得仲多過我哋果位吳局長，想作反都無時間。
傳統上，英國外相一職頗為吃重，惟近年角色逐漸被邊緣化。May姐上台首要任務係處理好Brexit呢件熨手山芋，於是她開咗兩個新位：歐盟關係專員同國際貿易大臣專責處理Brexit相關事宜。咦，咁外相仲有咩做？Good Question，咪就係全世界周圍飛，到海外推銷吓英國咁囉，堂堂大國外相淪為旅發局主席呀陰功。May 姐呢一着只能夠用一個字嚟形容：絕！
學星爺話齋，阿May 搵大口仔做外相呢招只能夠用一個字嚟形容：「絕」！
U-Turn又來了！
一直以為佢係留歐派，做咗首相後，大家開始估究竟May姐開邊瓣。正路諗，作為留歐一員，佢潛極水點都唔會想同歐盟完全割蓆。就喺呢個時候，爆出一段去年5月佢以嘉賓講者身分到高盛演講嘅錄音，在公眾面前沉默又潛水嘅阿May，對住班iBanker即刻「留歐將軍」上身，痛陳脫歐如何大鑊，例如企業將撤出英國搬到歐洲大陸云云。嘩講到咁，各路專家梗係言之鑿鑿話佢會傾向「半脫半留」，讓Brexit軟着陸啦。點知……
所有人都。估。錯。晒。她在毫無預兆下180度U-Turn轉鈦，講明「Brexit即係Brexit」，竟與歐盟一刀切，毫無留戀，反面快過翻書。然後發表精彩的Brexit演說，「我們要建立更強大，更公平，更團結，更外向的英國」。啲內容咁熟口面嘅？有啲似特朗普日日噏嘅：「我們要令美國再次強大起來」（We will make America great again）喎，裡面到底有無咩暗示呢？
舊盟友。新朋友
演辭中，May姐多次強調歐洲鄰國係好朋友兼好伙伴，卻又暗示希望同現在一樣維持對歐盟國家的零出口關稅，同時不排除向入口歐盟國家貨品徵稅，即係點？即係擺明玩嘢囉。點解佢把炮敢得罪歐盟？其實她演說中字裡行間洩露了部分玄機。
她指的「更外向」，意思是讓英國走向世界，跟更多國家做生意，仲抱怨加入歐盟幾十年來英國貿易GDP基本上零增長，明示暗示歐盟困住英倫三島經濟潛力，又話中國、巴西、同中東海灣國家已經表示有興趣跟英國簽定貿易協議，並計劃跟澳洲、紐西蘭和印度三個現任和前任英聯邦國家傾刁。
飛雲學Moses咁叫人「同朕再check吓」，發現論GDP經濟規模，歐盟呢批舊盟友係17萬億美元（下同）。潛在新朋友中國、巴西、海灣國家包括阿聯酋、沙特阿拉伯、伊朗、伊拉克、科威特，按2015年世銀數字計算，加加埋埋大約14.5萬億，加上3.5萬億的澳紐和印度，剛剛好18萬億。
May姐講得出，似乎對呢堆貿易刁胸有成竹，如果係真，就算無咗歐盟英國都唔使驚。當然不排除佢只係打嘴炮「大」歐盟，令佢哋唔敢放肆懲罰脫歐後的英國。歐盟近年受歐豬五國經濟危機和難民潮拖累，早已散散哋，同英國作對絕對無好處。所以無論呢堆刁流定堅，英國暫時都喺上風位。最重要嘅係，May姐仲有件秘密武器未出。
特朗普當選美國總統後，即刻打電話邀請May姐到白宮。佢肉麻地叫阿May做「我的瑪姬」（My Maggie），將兩人關係跟前美國總統列根與英國首相戴卓爾夫人嘅深厚情誼相提並論，列根會親切地叫戴卓爾夫人的小名Maggie，侵侵似乎想有樣學樣。
一個係出晒名嘅女權分子，一個係不斷侮辱女性的女人公敵，兩個思想上大纜都扯唔埋嘅兩個人，坐埋一枱傾生意，識笑真係幾好笑。做開生意嘅侵侵，清楚知道阿May需要啲咩，講明會盡早跟英國簽定「又快又公平」嘅貿易協議，自爆阿媽係蘇格蘭人，非常崇拜英女王，又讓阿May成為自己入主白宮後首位到訪外國元首，面子裡子畀到足。而May姐雖然對特朗普一直都不以為然，但訪美期間拖哂手咁，身體真係好誠實。
嗱，睇到呢到，就知道May姐一直係有部署，先係同其他國家打好關係，即使無咗歐盟呢個密友，經濟都未至於要死。然後再「肅清異己」，唔撐脫歐的話就來個提早大選，依家估計保守黨會係6月嘅大選中大勝，令到May姐拆Brexit呢粒炸彈會更得心應手，完全有鐵娘子應有的智慧同手段呀。