【中國上的舌尖】溝個鍾意去百老匯電影中心睇戲嘅女人
神州大地，只有你想不到，沒有她做不到。
溝一個鍾意去百老匯電影中心睇戲嘅女人，並唔容易，好聽啲講係你要習慣，唔好聽啲講係你要適應！
我係一條窮L，同佢一齊幾個月嚟佢都無要求我送乜嘢，佢突然之間講愛情唔可以飲水飽，令我打過突。
2009年藝穗會，Rebecca嘅首個畫展開展，衣香鬢影，十分熱鬧。
我畀預定時間遲咗到，最先開幕禮已經完咗，一眾賓客已散開各自賞畫。我離遠見到Rebecca同人傾計，佢驟眼見到我，向我揮手示意我過去，我氣急敗壞咁走過去。Rebecca向我介紹佢旁邊嗰位短髮女孩，Rebecca話：「呢個就係你個徒弟仔！」
我回頭向對方一望，禁不住用普通話叫咗聲：「祁壹(i213、音似「頁」)？」
對方微笑嘅用普通話答我：「是祁壹(iai213、音似「乙」)，不是祁壹(i213)。」
佢就係祁壹。祁壹係上海土生土長，但父輩係溫州人，佢個名發音仲有溫州話餘韻。後來先知道溫州話係中國各地方言中最難學嘅一種方言，同一個字有「文讀」「白讀」分別，佢個名「壹」字發音就保留咗家鄉文讀同白讀分別，我讀平時近普通話嘅白讀音，佢糾正我嘅係文讀音。
當時覺得佢好熟口面，但無理由，第一次見點會熟口面？醒起！佢個樣好似一位風靡近代中國知識分子，當代知青無人不起痰，視為不食人間煙火嘅一代女神——林徽因！
神州大地，只有你想不到，沒有她做不到。13億人口，竟然俾我遇到個咁似林徽因嘅女人。
因為研究生身分，祁壹係香港逗留咗幾個月，畫展嗰日係佢第二日嚟香港。
過年睇另類賀歲片
如是者，這段特別的書信姻緣，亦令我們二人一見如故，好快展開另一段特別而文藝嘅感情發展。
祁壹雖然似林徽因，但就有一米六八高，佢話佢已經係全家最矮嗰位。佢唔鐘意行商場，仲係少有嘅上海女仔唔喜歡shopping，但就好鍾意睇文藝電影，所以香港有個地方好啱佢！就係油麻地百老匯電影中心。
但係，溝一個鍾意去百老匯電影中心睇戲嘅女人，並唔容易，好聽啲講係你要習慣，唔好聽啲講係你要適應！
就好似農曆新年睇賀歲片，當個個情侶都去睇《家有囍事2009》，睇下中港融合片，笑下吳君如鄭中基嘅時候；我同佢走咗去百老匯電影中心，睇德國電影大師麥可漢納克嘅《白色恐懼》（德語：Das weiße Band），關注一班第一次世界大戰爆前無耐，德國北部一個村莊兒童唱詩班。
我最記得，係有次同佢睇舊片，高達導演喺1967年拍嘅《我所知她的二三事》，成套戲係咁影住啲妓女生活、影班人講廢話，係咁影住啲高樓大廈，影住杯咖啡係咁郁，係咁郁，係咁郁，係咁郁。
嗰年《國際電影節》，同佢睇哥普拉《Tetro》，成套黑白片，講一對失散多年重聚嘅兄弟情。故事發生係阿根廷，講男主角同父親關係好差，父親好潦倒咁離開阿根廷。多年後失散多年嘅細佬去阿根廷搵男主角，後來先知男主角個細佬其實係男主角好多年前，同後母偷情時遺下嘅骨肉，即係話親細佬即係佢自己個仔。媽呀！我都唔知自己講乜。祁壹話，呢個係弗洛依德所講嘅「殺父娶母」情意結嘅投射。
你可能會問我，我唔係讀哲學㗎咩？點解好似咁怕睇呢啲文藝片？咁我想問你係咪讀醫學外科就鍾意睇解剖？讀教育學就鍾意睇學生妹動作片？
除咗呢啲戲外，我最記得唯一一齣唔係同佢係百老匯電影中心睇嘅戲，就係臨回上海前一個禮拜，睇羅啟銳嘅《歲月神偷》。
唔信愛情可以飲水飽
睇完《歲月神偷》，散場嗰陣個個女人喊苦喊忽好似死咗自己個仔咁，但祁壹好冷靜。個晚我同佢行尖咀海皮一帶，我靜靜咁偷望側邊嘅佢，只見佢若有所思咁與我緩步並肩而行，散場後佢同我討論戲裏面嘅話題，我先知道原來佢睇完都好激動！
但佢話覺得一個女人好似崩潰咗咁當眾大喊，係好唔得大體，同埋佢話淚水會模糊咗佢視線，令佢唔能夠好清晰咁繼續欣賞套戲，所以佢用理智壓抑咗佢情緒，以沉默去面對激情。佢話片裏面主角家庭雖然貧苦，但就因為咁而令到一家人緊密生活，同甘共苦。但佢話佢唔太相信現實中有呢一套愛情飲水飽的情節，「太不現實了！」佢相信唯物觀，認為愛情都要物質基礎。
嗰下，我個心震咗一震，不期然停咗步，突然感到一股糾結。糾結，即係個心籮籮孿。我係一條窮Ｌ，同佢一齊幾個月嚟佢都無要求我送乜嘢，佢突然之間講愛情唔可以飲水飽，令我打過突。呢句話令我記起大家認識無耐嗰陣，佢陪我探我父母，佢好有心買咗有精美禮盒嘅西餅，仲買咗老人家鍾意飲嘅中國茶，當見面禮送上門。我叫佢唔好破費，佢話做人要「得體」。突然之間，祁壹大大聲叫住我：「幹嗎站着不動了？」我先恍然醒過嚟，快步向前追回步伐。
一個星期後，祁壹返去上海。無見佢幾日，雖然都收到佢一兩封電郵，但我個心七上八落，突然無戲睇，好唔舒服，我決定去上海搵佢！
（文章純屬作者意見，不代表香港01立場。）