【窮爸爸富爸爸．來稿】每個人都需要一個富爸爸
每日睇親新聞都喺講樓，樓， 樓。大陸人有大把錢買樓，後生仔又話要買樓（但冇錢買），女人又話冇樓唔嫁， 就連我樓下個看更阿伯都講樓。香港人真係癡左？唔知從幾時開始， 樓同一個人嘅成就變咗好似美元同港元咁——係掛勾嘅。 唔怪之得咁多人冇高潮啦。
文：好唔打得
所以而家有好多人會覺得自己好廢，好無助。甚至覺得呢個世界再唔會有咩希望。而呢啲人都好好好希望有一個富爸爸可以出現打救佢地，好豪氣咁幫佢full pay 或是最少借3成首期。
老實講，我曾經亦都係呢類人。
同好多人一樣，我有一個平凡嘅老豆，學歷唔高，忠忠直直，有啲古板，唔識投資，冇乜特別話教過我條路應該點行。所以成日覺得自己好慘，行左好多冤枉路。但係諗翻轉頭，我老豆何嘗唔係一樣？佢都冇人幫，冇人教，冇一個大家都非常渴望擁有嘅富爸爸。佢咪又係咁結婚生仔，然後養到我咁大。但係佢冇自艾自怨，最起碼冇係我面前呻。呢方面佢已經比我叻好多好多。當我諗通之後，我決定要改變自己。好似Obama話齌——要Change！最後，我選擇了嘗試大家成日所講嘅「知識能改變命運」。冇錯，我決定學人睇書。我講緊嘅唔係一兩本，而係保持一年每個禮拜一本。從此，我嘅人生真係180度大改變。
起初，我不停揀啲出名嘅文學書呀，歷史書呀，又厚又多字個D。完全錯晒！除左可以喺街到揸住本書扮下野之外，基本上我真係諗唔到有咩用。就算真係好認真咁睇完，都會好快唔記得晒。又話知識可以改變命運？你！呃！人！
但係，自從我遇到Robert Kiyosaki（本書）之後，我先明白到咩叫做人生知識。我終於搵到我既富爸爸啦。Robert Kiyosaki就係《窮爸爸，富爸爸》既作者。相信好多人都聽過，甚至乎睇過。
同大部份人一樣，佢老豆由細到大都教佢，要努力讀書，考第一，上大學，入大公司。咁就會出人頭地，生活無憂。我相信大家都聽唔少，喺唔喺？就算番學，啲老師都係講埋晒呢堆所謂既真理。直到你出黎打工，先知道考試成績好同升績加薪係完全冇關嘅。唔明?? 睇番以前比你差既中學同學，如今可能已經搵多你一倍。又或者溝左件有錢仔有錢女，住洋樓養番狗。
講番本書，作者個老豆就喺按照呢個 success formula 長大。勤力讀書，入大學，讀到PHD，最後仲入埋政府工。大家心諗，無得輸！佢老豆梗喺一定好掂，所以咪富爸爸囉！如果你咁諗，就完全錯晒。
話說有一日，佢老豆俾人裁員炒咗。人到中年先知讀書多都未必搵到工。最後，老年生活過得麻麻地，鬱鬱而終。呢個就係作者想帶出嘅一個窮爸爸的例子。相反，佢有個老友叫Mike，老豆只得初中畢業。但係通過做生意同埋識投資，最後成為當地首富。亦即係作者講嘅富爸爸。有趣嘅係，兩個爸爸最初嘅收入都係差唔多。但分別就係佢地嘅心態，想法同埋點樣運用佢哋賺番黎嘅錢。最終，富爸爸擁有嘅企業和資產令佢變得非常非常有錢。
可能你會話，cher……鬼唔知阿媽喺女人咩！但人大個咗之後，好多之前聽唔入耳嘅大道理都會忽然變得好有point。只喺細細個嗰陣唔明箇中道理。例如，打工無前途，唔係指個個要走去做start up。而喺，呢個年代已再冇一份工可以俾你舒舒服服咁做到退休呢支歌仔唱。
最慘嘅係，大部份打工仔去到中年嘅時候 。亦即係你開支最大嘅時候。公司往往會狠狠地將你裁走。就算到時你咁好彩搵番份工，但你已再冇咩bargaining power去叫價。甚至可能要卑躬屈膝。慢慢地，你嘅下場好可能會變成另一個窮爸爸。
當我睇到呢度之後，好驚，非常不安。但亦話俾我知，我需要開始做啲嘢：
學習點樣可以開拓多D唔同嘅收入來源 （到時被人炒左唔駛零收入）。學習按揭潛規則，例如自製fortnightly repayment供樓會節省幾年／咩叫 offset account／咩叫HELOC（ 呢個喺會直接影響到你成副身家）。而最重要嘅喺學習改變思維態度（唔好咩都話，好難／唔得／佢好彩啫）。例如我最近join左個club 去提升英語辯論技巧。繼續睇多D自我增值嘅書
所以，如果你仍然淨喺識得喺度埋怨你點解有個窮爸爸嘅話，唔該你不如多啲行下書局睇書啦。話唔定，你都可以搵到一本改變你人生嘅書。
（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）