即將今年9月重返香港開演唱會的鄧紫棋（G.E.M），早年因參加內地歌唱節目《我是歌手》後瞬間爆紅，更將工作重心放在內地賺人仔。相信不少她的粉絲都知道其實G.E.M嘅妹妹鄧伊伶(Elaine)都是唱得之人。日前，Elaine在Youtube開設新頻道上載自己唱歌的片段，首支影片就翻唱了林俊傑的《修煉愛情》。不少人睇完都有留言，「很好聽保持這種水準，這才是唱歌！別學你姐只會亂叫一通」G.E.M真係躺著也中槍。《香港01》透過facebook訪問到Elaine時表示，「呢樣就實在係太抬舉喇！佢勁太多啦 。」

其實Elaine早在2011年就曾參加第3屆《Supernova2011》全港聯校歌唱比賽，當年年僅15歲嘅佢就唱出Alicia Keys的《 If I ain't got you》殺入最後五強，淨係聽把聲應該會認錯做G.E.M，因為實在太似!!但之後再聽返今次翻唱林俊傑的《修煉愛情》，唱功似乎就變得更有個人風格，完全無咗家姐嘅聲音。

其後我們透過facebook訪問到Elaine，她透露是因為剛大學畢業，所以暑假趁有空閒時間才唱歌，「Post上youtube純粹想做個紀錄，好surprise有咁多人聽。」咁對於加入娛樂圈有無興趣？Elaine就話，「目前就無乜興趣喇。（有人Approach你？）有人Approach一齊jam下歌玩下睇下，遲d會唔會都出下坊間嘅表演咁。」畢業於香港大學心理系的Elaine表示，希望日後的工作都圍繞住社會問題，「目標想work towards achieving social equality and promoting mental health issues 。(會唔會覺得浪費唱歌才能？) 得閒會繼續唱歌架，只係唔打算全職唱歌。」咁家姐G.E.M有無說服過她入行？Elaine指，「佢支持我鐘意做咩就做。」她其後亦透露下一首歌將會唱廣東歌，但就不會是家姐G.E.M嘅歌曲，話唔想擺家姐上枱！