現年42歲的梁芷珮（Christy）與老公Kenneth結婚多年，育有兩子一女，一家五口幸福美滿。梁芷珮同老公更夫妻檔拍住上成為旅遊KOL，經常孖住周遊列國為大家介紹好去處，近年更憑主持TVB旅遊節目《潮什麼》系列而大受歡迎，實行寓工作於娛樂！兩人在工作上非常合拍，私底下亦非常恩愛，但日前梁芷珮就分享了一件「趣事」，似乎被老公激親！

梁芷珮在IG曬出一張老公的照片，相中所見Kenneth一臉驚恐，表情耐人尋味，原來絕不簡單：「阿妹啱啱問我可以用乜嘢嚟洗面，我話浴缸入面個洗面番梘，我晚晚用，好好用，好乾淨，跟住黎生就立即咁樣望住我，我問佢個樣做乜咁尷尬，佢話冇嘢🤓我即刻唸，佢唔係用嚟洗腳呀…佢話，梗係唔係啦…我話，但你個樣好尷尬喎…佢話，我用嚟洗手。我話，淨係洗手？佢話，係，洗手。我話，沖緊涼你攞舊番梘淨係洗手？仲話，係呀…我淨係洗手…結論係，我有個唔識講大話嘅好老公，同埋我立即用返洗面粉洗返十次我塊面，同埋🤬」

雖然未知Kenneth用洗面番梘洗什麼，但不少網民都笑言「凶多吉少」：「我覺得唔會洗手咁簡單囉…其實都沖緊涼點會無啦啦用舊番梘洗手呀…有可疑…」、「你有冇聞吓佢隻腳，係咪同一種香味」、「用番梘洗腳真係好乾淨的」。