香港專業電影攝影師學會今晚舉行周年晚宴，林峯、衛詩雅獲「攝影師眼中最具魅力獎」。林峯受訪時表示拍攝時多得攝影師照顧，獲認同亦十分大鼓勵，自己亦憶起入行時蝦碌。「喺佢哋鞭策下先有而家行位咁準，全靠佢哋提醒。」林峯透露過年後開新戲，因要與小演員合作，故有溝通之必要，不過對於已為人父的他來說應該是架輕就熟。

林峯又透露囡囡甚有鏡頭觸覺，會學他最浮誇的表情，但因未有機會睇廣告，所以未學到「飛鷹」。他又表示希望5月演唱會，時間許可的話安排囡囡捧場。

剛由荷蘭返港嘅衛詩雅，婚期在即，她坦言自己有咩未做都唔清楚，相集、成長片段仍未揀選。「本身想喺飛機搞，但最後係咁睇戲，打算今晚返去搞。」而向來無投訴嘅未婚夫亦有微言，主要是因為擔心其身體狀況。衛詩雅又表示心情緊張，睡覺時亦會突然醒來，不過慶幸終於有時間小休，問到會否搞婚前派對，她說：「因為唔得閒，但我覺得要，成班女仔圍埋一齊。」