08年香港先生温家偉，雖然人稱大隻仔，但其實只屬於大嚿，但最近為了一部電影決定狂操，用了兩個月時間，由肥仔變大隻，６嚿腹肌盡現，他說：「其實我係簽出面經理人公司，咁呢次就有個機會拍電影，去浮羅交怡取景，陽光海灘自然要騷下身材，咁就決定用兩個月時間好辛苦咁操啦，澱粉質就一定食得少，朝早就食４隻雞蛋加一碟西蘭花，汽水甜嘢就一定冇㗎喇，肚餓就食果仁。」

至於減肥秘技，其實離不開食少啲，做多啲，過百下sit up這些係基本，他說：「我隔日就轉一轉訓練方式，因為肌肉會習慣咗，每次都會跑３０至４０分鐘，腹肌練習都係不停轉下，每次３００下左右，其實我係減咗５磅，但脂肪比率就低咗好多，起碼１０％，呢個應該係我人生最fit嘅時候，有時夜晚真係好肚餓就真杏仁當宵夜，下晝就食雞胸加西蘭花，夜晚就牛扒加蕃茄，今次都有食大隻奶粉，其實因為我要拍戲先會用咁極端嘅方法，如果再多啲時間一定會再靚啲。」其實６嚿腹肌彈哂出嚟，大隻仔呢次真係堅大隻，冇得再靚喇？