黃秋生有份拍Defenders!? 要數黃秋生經典角色，重情重義的古惑仔大飛哥絕對唔少得。呢日(16日)Netflix香港官方Facebook上載一條，《漫威捍衛者聯盟》（Marvel’s The Defenders）宣傳片，黃秋生由大飛哥變做大飛爺，於宣傳片中由頭帶到尾，見到專誠為香港市場拍攝宣傳片，網友紛紛表示驚喜，童年回憶返晒嚟呀，仲話好期待大飛爺會參演一角﹗

宣傳片一開始發生於懷舊港式茶餐廳，黃秋生身穿黑色西裝暗紅色呔，手執一杯茶側身坐在桌旁，兩名古惑仔入到餐廳即叫人：「大飛爺」，秋生問二人最近生意如何，然後示自己啲場唔係好掂：「今次呢單野，好大鑊架﹗」到底邊個可以令見慣風浪嘅大飛哥，呀唔係，係大飛爺咁驚青呢？

據大飛爺所講，有幾個人出現連環掃晒佢旗下場所，打到手下們都入晒醫院，兩個古惑仔輕佻表示無人郁到佢地，大飛爺即拍檯大罵：「你兩條友，係咪當我講嘢唔係講緊嘢架﹗吓﹗」好有霸氣呀，兩個古惑仔嚇到彈起，詢問知唔知對方底細。

「一個呢，就神出鬼沒，來無影去無蹤嘅(夜魔俠)；另外一個呢，個拳頭就好似著咗火咁，當道牆好似紙皮咁打，一錘就打得穿嘅(鐵拳俠（Iron Fist）)；仲有一個呢，就廋廋削削，表面睇起上嚟普普通通嘅一個女仔，但係就十幾個大隻佬俾佢一野掃低晒(潔西卡瓊斯（Jessica Jones）)；最後一個呢，仲擋到子彈嘅，槍都打佢唔死﹗大佬呀，子彈都擋到點同佢揪呀(盧克.凱奇)？」大飛爺愈講愈激動，提起四個敵人更神色恐懼，就好似敵人企喺佢面前。

當兩個古惑仔以為大飛爺有幻覺，叫佢唔好飲太多時，秋生終於擰轉身正面對住鏡頭，驚見其右邊面佈滿傷痕，眼皮腫起一大塊，狀甚恐怖：「你兩條友，大難臨頭仲懞吓懞吓﹗」此時另一古惑仔氣來氣喘衝入茶餐廳大叫：「大飛爺，殺到嚟啦﹗」放低手上電話於檯上，電話顯示《漫威捍衛者聯盟》，原來是宣傳片﹗

明顯地大飛爺提及的四位正是Netflix獲Marvel授權拍製的王牌劇《漫威捍衛者聯盟》（Marvel’s The Defenders）中四個要角：夜魔俠（Daredevil）鐵拳俠（Iron Fist）、潔西卡瓊斯（Jessica Jones）及盧克凱奇（Luke Cage）有別於「復仇者聯盟」打擊邪惡組織或是龐大的外星勢力，「捍衛者聯盟」聚焦在紐約市區，以保護市井小民為主，被視為「平民英雄」。

好多網民對Netflix感到驚喜，有人笑言應該搵埋王浩信參演(你懂的)，大家仲好期待可以喺劇中見到大飛爺演出。Netflix回覆香港01查詢，表示呢次係專誠為香港拍攝一條宣傳片，對於點解會搵秋生演出：「因為秋生好傳奇同好多人識嘅演員，對於呢個故事嘅敘事方式好適合﹗」至於劇中會唔會見到秋生：「星期五就知﹗」大家唯有再等多兩日啦。