Neway大少薛世恒大學時夾過Band：對唱歌有興趣但演戲先

已正式投身演藝界的Neway大少薛世恒（Daniel）這日以嘉賓身份出席《大家樂壇2017》街頭音樂會，欣賞一眾歌手樂隊表演，包括許志安、王灝兒（JW）、Supper Moment以及觸執毛等的演出，而王芷晴與男友也有拍拖到場支持。Daniel原來很喜歡唱歌，且有學過唱歌，至於歌喉方面，他謙虛地表示：「我有很多朋友教唱歌，我唔敢話自己唱成點。（會進軍埋樂壇？）對唱歌有興趣，但想演戲先，等演戲做出成績再算。」他又透露在讀書時曾夾band：「我負責打鼓，有時也會唱歌，大學時有搞騷仲可以賺錢，都幾好玩㗎。（會否技癢想上台唱？）想唱歌會去卡拉OK，上台唱要好多準備，唔係話上就上，我都想搵人jam下歌先。（大學夾band咪好多女仔鍾意？）無啦，我都以為有㗎嘛。」

另外，問到Daniel現在是否完全沒有再打理家族生意，他說：「我無打理好耐喇，其實我9年前已經無再幫屋企手，我2008年時已經無做家族生意，開始發展自己的生意。當年我碩士畢業後幫屋企手是因為我爸爸（薛濟傑）要去留學，我爸爸是白手興家，年青時沒有大多時間讀書，他要重返校園，便叫我幫手打理家族生意，爸爸用了5年時間完成了博士課程返來後就由他自己接手，我就去做自己喜歡的事。我要發展自己的事業，想有自立能力，不能一世靠爸爸，所以要有自己的生意。」他又再次否認傳聞所指因失寵才不能打理家族生意：「絕對無咁嘅事，我和爸爸的感情一向好好。（話你同弟弟薛家麟爭寵？）完全無，其實我們大家做的都不一樣，根本不需要去爭甚麼。」