瘀到似屍斑未開得工　梁烈唯：用替身仲好又有錢收

梁烈唯受傷片段近日喺網上流出，見到唯唯企喺行人路靠後方準備，一男一女則喺馬路旁邊準備過馬路；然後唯唯衝向兩人，右手先撞到男人，然後唯唯似收唔住掣直撲行車道，藍色私家車就喺呢個時候駛埋嚟，剛好撞到唯唯，唯唯被拋上車頭翻咗一圈後喺車身右邊跌落，膝頭先落地。

意外過咗幾日，梁烈唯喺ig貼出隻腳嘅受傷情況，右腳膝頭明顯有傷痕而且有一大片黑色瘀傷，唯唯留言話：「想點？好似屍斑咁？」佢喺電話中解釋：「照咗冇斷骨，但啲瘀血而家至逼晒出嚟。」佢話意外當日即刻去咗律敦治醫院再轉到養和醫院，即照X光知道冇斷骨，而家唔係太痛，勉強慢慢行都得，但過兩日至約到專科醫生詳細檢查。

講到意外發生經過，唯唯話傳媒指係司機開得太快其實未係全部真相，佢話：「劇情講我俾吳卓羲追，我衝出馬路，撞到武師（男）然後個武師飛上車頭蓋。但可能個武師察覺到車速快咗，後退咗一步，我一跑就過咗佢就撞到架車。」唯唯話嗰刻腦海一片空白，自然反應係跳起睇下避唔避到架車，結果避唔到，但幸運地身體轉咗一圈，頭部冇撞到擋風玻璃，佢話當雙眼望到地下就下意識用手撳地，至避過頭部直撞地面。「但係我冇怪個武師，佢又拖住個女仔，如果佢唔避開可能3個都受傷。」

受傷後醫療費用由劇組支付，但因套劇原本預計8月尾至9月初完工，兼且唯唯仲有幾場打鬥場面未拍，而家可能影響進度，唯唯就話：「本來啲打鬥場面唔用替身，但係而家諗住用，用替身仲好啦舒服啲，又有錢收！」不過唯唯話最唔高興並唔係受傷或者開唔到工，而係呢段時間唔可以做運動喎！