【專訪．青年警察】姜河那自豪有完美Body　鬥贏朴敘俊：I win！

姜河那、朴敘俊主演嘅新片《青年警察》在韓國上映時，雖然撞正《軍艦島》，但無論係口碑且或成績都唔錯，對於因入伍而要暫別娛樂圈嘅姜河那來說，500萬入場人次絕對最好的禮物。近年經常因工作來港嘅姜河那，日前孖住導演金周煥接受訪問，分享拍攝時嘅點滴以及將要面對新環境嘅心情。

《青》片故事講述朴敘俊同姜河那在警察學堂一拍即合成為好友，一次機緣下目擊一宗綁架案，由於求助無門，於是決定自己救人，過程好笑又好痛。姜河那笑言現實中並不會太魯莽，但只要認為對的，都會去做。「有無因為這樣而撞板？嗯……我都不是一個成日闖禍的人。」在旁的導演金周煥認為就算要姜河那同朴敘俊交換角色演出的話，都應該沒有什麼問題，更大讚二人是健康好青年。「河那內心十分溫暖，而敘俊就係一個好聰明的人，好多謝他們選擇了我的作品。」

戲中動作場面連連，被倒吊的朴敘俊翻身自救一幕，瞬間令觀眾以為睇緊《職業特工隊》，問到姜河那可曾想挑戰該高難度動作，他不加思索就話：「完全無！哈哈！好彩唔使我做，我只係想快點被救。」他透露連串動作埸面，導演金周煥一早已經預咗俾朴敘俊做，導演聽罷表示：「河那身形較為瘦削，敘俊就厚啲大隻啲，河那的身形應該會係女仔鍾意，而男仔就會欣賞敘俊多啲。」姜河那隨即開心大笑，並以英文表示：「I win。」

姜河那說自己未有因為電影要刻意操肌，但都有體力管理，而每次拍攝動作場面之前，都會同朴敘俊以及導演仔細商量，務求將受傷率減到最低。「最辛苦是拍攝時是冬天，而一開始要追車一幕，因為我條腰不是太好，所以跑不到太快。」導演笑言朴敘俊所有動作埸面都完美地消化，直指他「不是人。」提到片中有不少粗口對白，姜河那亦自爆私下都會講粗口，而導演就話向來都會有圍讀習慣，但由於今次都想兩位主角有新鮮感，所以不少對白都是在無排練的情況下講出，效果出奇地好。

過往不少韓國男星對入伍一事避而不談，但9月11號就入伍的姜河那就話對即將面對的新事物十分期待。「其實一直都好想早些入伍，加上覺得現在是一個好時機，所以就選擇了27歲入伍。現在生活都好自由自在，我希望兩年後都是這樣，不希望為了追逐某些東西而去做。」看完這篇訪問，是否覺得「美談製造機」這個稱號非常之切合姜河那？他說其實與他人相處之道，最緊要係開心，並感謝大眾封他為「美談製造機」，導演開玩笑表示姜河那今日已經升級為「美談心臟」，意即由內到外都咁善良。

場地：萬麗海景酒店