周慧敏王馨平湯寶如合體唔唱《美少女戰士》 插畫家謝曬皮鬧浪費
「你你你快跪下，看我引弓千里箭」《美少女戰士》咁經典嘅主題曲，曾經風靡萬千少男少女，當年（1994年）主唱嘅周慧敏、王馨平同湯寶如都係紅極一時嘅偶像歌手。
尋晚《流行經典50年》難得3人同台，但竟然冇唱《美少女戰士》，引起觀眾極大反應，本地插畫家謝曬皮亦喺社交平台畫咗一幅3人同台嘅圖畫，但就嚴厲批評唔唱《美少女》，網友亦留言投訴TVB欺騙觀眾。
要數佢哋3個嘅金曲真係有排數，周慧敏嘅《天荒愛未老》、《如果你知我苦衷》、《愛你多過愛他》、《孤單的心痛》等數都數唔晒；王馨平有《別問我是誰》、《愛一生也不夠》亦好經典；湯寶如雖然顏值唔夠高，但勝在有實力，一出道就同張學友合唱《相思風雨中》，去K必點。
但係3個人合作就一定記得《美少女戰士》主題曲，當年3人都係寶麗金小花，首歌一出即刻唱到街知巷聞，而家好多人都仲回味緊。所以尋晚難得佢哋一齊出現喺《流行經典50年》，觀眾梗係希望再聽到佢哋唱呢隻歌啦！
但係等咗成晚，期待嘅畫面都冇出現到，最激氣係成晚提住美少女美少女，更令觀眾期望愈大失望愈大，有觀眾甚至嬲到完場。
本港插畫家謝曬皮亦喺facebook畫圖兼爆粗批評：「btw請呢個組合上黎（嚟）但唔唱美少女真係XX」。即時激發起網民留言鬧TVB「唱美少女戰士係社會責任泥（嚟）架喎！」、「我由九點三開始期待到九點半仲唱緊不要自作多情去做夢，而家諗起好似X我咁，好嬲好嬲呀」、「講到似層層話唱，點知呃我睇埋啲咁嘅嘢！」、「成晚都美少女前美少女後，點知係《自作多情》！真係堅嬲被人呃咁！」群情洶湧。
《美少女戰士》主題曲係1994年TVB為配音版卡通劇集錄製的廣東歌，由寶麗金3大小花合唱，首次被收錄喺大碟係同年嘅湯寶如《給世界多一個微笑》大碟，之後收錄過喺王馨平1997年推出嘅《Time After Time新歌+精選》大碟入面。