尋日容祖兒出席IFPI唱片銷量頒獎禮嘅時候連掃6個獎，成為大贏家嘅同時佢預告自己今年唔會爭獎，皆因自己今年未有歌派台，講到明唔爭獎咁囂張？記得上次講呢句說話嘅人就係校長（譚詠麟），大家同樣係拎完呢個IFPI獎之後宣布，唔同嘅係校長係以後都唔拎獎，而Joey只係今年唔拎啫。

Joey聲稱自己係超額完成咗佢一生要做嘅嘢，講到今年唔拎獎咪即係會斷纜冇得一直冧莊落去，佢就話：「首先又唔覺得連任係必定做嘅事，亦唔係一個健康嘅現象。」此話一出隨即就畀網民炮轟，話佢一早就應該咁做，生人霸死地阻住其他人上位，搞到好多應該拎獎嘅人焗住做阿二，好似之前幾年謝安琪、何韻詩都畀佢壓住。

好喇，人哋依家話唔拎，咁邊個去繼承個寶座呢？大台嘅勁歌唔使諗肯定捧自己星夢友，IP都唔駛check，仲唔係吳若希，又或者係新寵菊梓喬？再唔係就應該係親生女欣宜喇，但如果真係頒畀欣宜大家又唔Like。咁好喇，唔講圍威喂嘅勁歌，講有公信力啲嘅叱咤，上年排第二第三嘅係Gin Lee同JW，如果Joey唔拎最有機會就係佢哋兩個喇，但如果真係佢哋兩個拎，又覺得好似唔係幾夠資歷，應該食多幾年夜粥先。

講到底，唔係Joey霸住個「樂壇關愛座」，次次頒獎禮都敬老頒畀佢，（祖兒年紀輕輕只是出道早紅得快，這裏說的敬老，是敬她的老資格。）而係香港樂壇青黃不接，後繼無人。記得2001年勁歌金曲頒獎禮，有個獎叫致敬大獎，當時為咗向梅姐致敬，邀請咗鄭秀文、容祖兒、楊千嬅、陳慧琳、梁詠琪、何韻詩一齊合唱梅姐嘅《似水流年》，呢個組合真係有今生冇來世，當時呢6個歌手嘅權力同資歷都被大家所肯定，好似七國鼎足咁，是但一個拎女歌手金獎，雖然未必係大家心目中嘅心水，但最少條氣都會順。時至今日，當年咁多個爭獎女歌手個個都結晒婚咁滯，鄭秀文、楊千嬅、陳慧琳、梁詠琪，全部都變晒人妻，安心相夫教子。而其後唯一後起之秀，有機會同Joey一爭天下嘅謝安琪亦都結婚生仔退隱江湖，根本依家係冇人接棒做一姐。

舊人已去，新人遲來，個個都攞獎，唔通個個都想攞獎咩？