森美今朝喺電台節目《早霸王》中一個試食環節，試飲來自張家界嘅蕎麥茶，一邊飲一邊講起張家界呢個著名景點，提到當年紅遍全球嘅電影《阿凡達》曾到當地取景，成為戲中潘朵拉星球各種元素嘅原型，其中一個景點更因此而改名做《阿凡達》「哈利路亞山」，森美就好大反應話，點會改名去遷就電影，仲笑言應該將戲入面嘅地名改番做張家界，D外星人變番做張生張太。森美接受香港01訪問時話：「成個景點改名就緊係有失身份啦！」

咁到底係咪真有其事呢？翻查紀錄，張家界三千奇峰中，其中一座本名為南天一柱，又名乾坤柱，位於世界自然遺產武陵源風景名勝區袁家界景區南端，海拔高度1074米，垂直高度約150米。2010年1月25日，正式被更名為《阿凡達》「哈利路亞山」，當日數百名土著居民及海內外遊客見證了更名儀式。主持更名揭幕儀式的管委會主任宋志光解釋，「南天一柱改名是景點改名，並不需要到政府機關登記。」

森美接受訪問時話：「三千幾座峰當中一個改名，都尚算可以嘅，當時俾套電影拍攝都係Gimmick，成個景點改名就緊係有失身份啦，要分莊閒呀嗎。不過唔止內地會因為電影改名，我記得自己去過日本南邊一個地方叫幽靈公主，係一個世界自然遺產（按資料應該為鹿兒島縣佐多岬以南的屋久島），因為這套卡通電影大熱而改名，大家都慣咗叫呢個地方做幽靈公主，不過都係別名而唔會正式改地名。」

不過有趣的是，2009年12月，《阿凡達》導演占士金馬倫，於參加北京首映時曾經講過，電影中「哈利路亞山」原型來自中國的黃山。但張家界方面人士稱，荷李活攝影師曾在張家界進行為期4天的外景拍攝，大量圖片後來成為《阿凡達》中潘朵拉星球各種元素的原型，其中南天一柱圖片就成為哈利路亞山，即懸浮山的原型，估不到1個多月後張家界方面就舉行改名揭幕儀式，當時改名一事成為熱話，有網友認為張家界沒必要因為一部電影而改名換姓，亦有網友覺得此舉更能證明《阿凡達》懸浮山原型地就在張家界。