一直以來，模仿偶像都必須死，尤其是扮演受歡迎、人人都膜拜的偶像。不過，凡事都有例外，就好似5歲小朋友，有迷你GD之稱的周筠浩，自從暑假參加《Big Big小明星》時，超有自信chok GD樣，引起一時話題。不少網民就覺得，年紀輕輕就自信爆棚，大個仲得了？

話口未完，小GD再以行動震撼你。就是100％模仿他的偶像GD，翻拍《Crooked 》MV。話明模仿，小GD在造型上都跟到足，就好似GD的標準眼線兼「假墨」標記，都一一畫在臉上。就連GD身上的英國國旗衫，小GD都照辦煮碗。同場更找來丁子朗及Super Girls的aka演出，但都無損小GD的風頭。

小GD在MV一貫Chok爆兼自信爆棚的風格，唯一跟不足就是因為年少的關係，未能染一頭白金色頭髮。不過，睇到Casper的型爆MV，就好似睇緊迷你版GD咁。一向逢扮必踩的網民見到袖珍版GD，都被徹底溶化，皆因小GD真係做得好出色，舞又跳得好睇，又有晒台型，所以都口徑一致，大讚他：「真係好得意，OMG！」、「大個一定做舞王！」年紀輕輕的小GD如此出色，相信大個一定必有作為。