近年大陸網劇崛起，片商以重金籌拍網劇，例如雲集多位香港演員嘅《反黑》一播出就大受歡迎，靠網路掀起討論潮及高收視。而近日傳出又有一套新嘅網劇正在籌備，更會由陳冠希飾演男主角，做一個負面新聞纏身的偶像明星，網友見到呢個消息都不禁話：「好似佢真實人生翻版！」

Edison近年主力發展時裝生意同埋音樂，對上兩套內地戲劇作品已經要數到2014年懸疑劇《探靈檔案》以及2015年的紀錄片《觸手可及》。呢次傳出Edison將演網劇《套路》，飾演一個被負面新聞纏身的偶像明星，身上有一股俠義精神、熱血善良、自信但愛出風頭、且個性衝動一點就着…咦！點解同陳冠希本人經歷咁相似嘅？

當年Edison一出道就萬眾觸目，歌影雙棲發展，不過負面新聞、緋聞亦時有發生，無論係同狗仔隊衝突、同余文樂嘅撞膊事件，仲有後來轟動全球嘅艷照門事件等……如果Edison真係接演呢套網劇，可以話係本色演出。

呢套網劇仲係籌備當中，從網上流傳的海報和已曝光消息得知，戲中仲搵嚟古天樂、鄭嘉穎、謝天華、黃日華、楊恭如等實力演員參演，陣容鼎盛，並由曾經執導《五億探長雷洛傳》、《藍江傳之反飛組風雲》、《我要成名》等電影嘅劉國昌出任導演。到底呢套劇真係重金禮聘，打動到Edison本色演出？定係好似啲節目巡禮一樣，演員陣容只係講住先呢？實在好可疑。