黃美棋日本拍TVB越野競技節目 左手中指受重創:腫到巨峰提子咁

撰文:洪曉璇
出版:更新:

黃美棋簽約「回歸」TVB之後,曾經現身《big big channel失驚無神賀中秋》捽碟,暫時未被安排入組拍戲,會先向主持方面發展。最近美棋同胡諾言及簡淑兒等齊齊去日本拍攝越野競技節目,跑6公里障礙賽,賽事中有廿幾個障礙物,加上超強颱風「蘭恩」吹襲,美棋於比賽中發生意外,手指腫到變日本蕃薯咁大﹗仍然身在日本嘅美棋接受香港01訪問時話:「俾一個接近60磅嘅鉛球揼中手指,即時腫到成粒巨峰提子咁﹗」

黃美棋毫不錫身,為完成賽事攪到成身泥都無有怕。(黃美棋Facebook)
黃美棋完成賽事後,上網報告傷勢。(Facebook截圖)

惜日嘅小芬女「回娘家」,不過就暫不拍劇改向主持界發展,估唔到呢次喺日本拍攝就已經出意外,身在日本的黃美棋接受香港01訪問時,分享受傷經過:「今次黎東京主要係拍攝呢個斯巴達障礙賽,受傷嘅過程其實係其中一個障礙要搬一個接近60磅嘅鉛球,因為實在太重,所以係中途唔小心成個鉛球揼中咗隻手指,但當時都無即係檢查傷勢,只係一心諗住要完成個比賽!直到完哂成個比賽,除低隻手套先見到原來隻手指腫到成粒巨峰提子咁,不過見D關節郁到,唔係骨折就放心,咁呢兩日就敷下冰同捽下藥膏,都開始散瘀。」

黃美棋俾個60磅嘅鉛球揼中,右手中指腫咗一倍有多。(黃美棋微博)

超強颱風「蘭恩」吹襲日本,美棋不諱言惡劣天氣,令是次賽事增添不少難度:「因為呢個颱風,所以我地呢度落咗幾日雨!比賽果日最大,愈落愈大,每一關都難咗,天氣又冷,得十二度左右……其實好玩嘅,同埋真係挑戰到自己,因為我一路都覺得自己做唔到,結果可以完成其實好開心,整親少少都值得」

鍾健威要好好照顧美棋呢個容易受傷的女友啦。(鍾健威Facebook)

賽事前個多月一直陪美棋操練嘅鍾健威,接受香港01訪問時話,第一下見到女朋友傷勢係以為自己被整蠱:「比賽當日佢無帶電話,全日都失聯,夜晚佢影手指俾我睇,我仲以為佢喺日本買D手指套整蠱我,指頭腫隨巨峰提子一樣,因為佢喺賽事開始無幾耐已經整親,可以忍痛完成賽事,係好Proud of美棋。」Ray話一定會去接機,不過美棋話骨應該無事,唔使特別去睇醫生:「會做埋醫生嗰份幫佢捽下消腫,應該好快無事。同埋佢呢個人食嘢就開心晒,咁叻女完成賽事,返嚟帶佢食餐好就得。」

成功挑戰6KM障礙賽,鍾健威話會請黃美棋食番餐好﹗(黃美棋Facebook)
+16